योजना कार्यान्वयनसम्बन्धी सचेतना कार्यक्रम

पहुरा समाचारदाता
धनगढी, २ फागुन । योजना कार्यान्वयन ओ उपभोक्ता समिति, गठन, परिचालन तथा व्यवस्थापन सम्बन्धी कानूनी व्यवस्थाबारे अँट्वारके रोज धनगढीमे एक दिने सार्वजनिक सचेतना अभियान निम्जल बा । ग्राम विकास तथा अनुसन्धान केन्द्र (आरडीआरसी) धनगढीके आयोजना तथा धनगढी उपमहानगरपालिकाके सहकार्यमे हुइल रहे ।

कार्यक्रमम वडा स्तरके योजना पहिचान, उपभोक्ता समिति सम्बन्धी व्यवस्था, अनुगमन समितिके व्यवस्था, सार्वजनिक खरिद नियमावली, २०६४ मे रहल व्यवस्था, सार्वजनिक खरिद ऐन, २०६३ मे रहल व्यवस्था लगायत विषयमे छलफल हुइल रहे ।

अस्टेक, कार्यक्रममे धनगढी उपमहानगरपालिकाके योजना अधिकृत सत्यराज जोशी वडा स्तरके कार्य योजना पूरा करेक लाग समन्वय ओ सहकार्य करके आघे बह्रेलेसे दिगो विकासमे सहयोग पुग्ना बटैलैं । उहाँ कहलैं, ‘काम करेबेर सहयोग नैकरके विरोधके नाउमे विरोध करके विकास नैहुइठ, सबजे सहयोग करलेसे अपने ठाउँ विकास हुइ ।’

आरडीआरसीके जिल्ला संयोजक ठाकुरप्रसाद करियाप्रधान सहजीकरण करल कार्यक्रममे धनगढी उपमहानगरपालिकाके वडा नम्बर १, ११, १५, १६ ओ १७ के वडाध्यक्ष लगायतके जनप्रतिनिधिहुकनके सहभागिता रहे । धनगढी उपमहानगरपालिकाके प्रवक्ता तथा वडा नम्बर १ के वडाध्यक्ष सन्तोष मुडभरीके अध्यक्षतामे हुइल कार्यक्रममे सहभागी शिवानी चौधरीलगायत मन्तव्य व्यक्त करले रहिट ।