घटनाहे राजनीतिकरण करे खोजल अशंका
पहुरा समाचारदाता
धनगढी, ३ फागुन । छाइक महिनावारी रुकलपाछे डाइ आपन छाइहे चेकजाँचके लाग लग्गेहेक स्वास्थ्य चौकीमे चेकजाँच कराइबर पेटमे तीन महिनाके बच्चा डेखगैल ।
गोदाबरीके एक बालिका मानसिकरुपसे सुस्त बाटी । महिनावारी सुरु हुइल ढिउर दिन फेन नैहुइल रहिन । उमेरसे उहाँ १३ बरसके किल रलेसे फेन ज्यान बरवार डेखजैठिन् ।
ओहकान नाना (मामा घरेक बुडु) आपन घर बोलाके अश्लिल भिडियो डेखैटी पैसा डेना प्रलोभनमे पारके बलात्कार करल रहिट । छाइक महिनावारी २ महिनासे रुकलपाछे शंका लागके ओहकान डाइ फेनसे स्वाथ्य चौकीमे चेकजाँच पश्चात गर्भ रहल पतापाइल पीडित परिवार बटैले बा ।
‘छाइहे धनगढी लानके, एक अस्पतालमे गर्भ परीक्षण कराइबर रिपोर्ट पोजेटिभ आइल ।’ माघ डुसरा अँठ्वार करल परीक्षणमे बालिकाके पेटमे बच्चा रहल पुष्टि हुइल रहे । ओकरपाछे उहाँहुक्रे छाइहे पुछल रहिट ।
बालिका नाना बलात्कार करल डाइहे बटैली । बालिका आपनउपर दुरव्यवहार कैना व्यक्ति ५० बरसके बिसराम कहिके चिन्हजैना कालुराम चौधरी रहल बटैली । कालु घरमे कलेसे मारडेना धम्की डेहल बात फेन सुनैली ।
बालिकाहे करणी करल चौधरीहे जिल्ला प्रहरी कार्यालय कैलाली पीडित परिवारके उजुरी पश्चात माघ ९ गते पक्राउ करसेकल बा । मने पक्राउ हुइल उहाँहे अदालतमे पेश करल नैहो । ओइसीक करलमे प्रहरी गडबड करटी रहल बाटै कि कना अशंका पीडित परिवारके रहल बा ।
परिवारके एक सदस्य कहलै, ‘छाइक पेटमे रहल बच्चा दिन प्रतिदिन बरवार हुइटी जाइटा । बच्चाहे जन्माइ सेक्ना अवस्थामे छाइ नैहो । मने प्रहरी प्रशासनसे का कैना कना कौनो सुझाव नैआइठो । प्रहरी टे बच्चा फेँके कहटी रहल बा ।’ प्रहरी घटना मिलाइ खोजल ओहकान आरोप रहल बा ।
‘हम्रहीनहे प्रहरी कार्यालय भिट्टर जाइ फेन नैडेठै । बलात्कार करुइया पक्राउ परल २२ दिन हुइल बा मने अदालत पठाइल नैहो । घटनाहे राजनीतिकरण करे खोजल कना शंका रहल बा,’ पीडित परिवार कहलै ।
भागरथी हत्या प्रकरणः कांग्रेस केन्द्रीय सदस्य लेखक स्थलगत अध्ययनमे
बलात्कारपाछे हत्या करल बैतडीके दोगडाकेदार गाउँपालिका–७, चडेपानीके १७ वर्षिया भागरथी भट्टके घटनाके स्थलगत अवलोकन ओ अध्ययनके नेपाली कांग्रेस केन्द्रीय प्रतिनिधिके रूपमे खटाइल नेता रमेश लेखक बैतडी पुगल बाटैै । पूर्वमन्त्री समेत रहल कांग्रेसके केन्द्रीय सदस्य लेखक घटनाके स्थलगत अध्ययन कैके पार्टीहे प्रतिवेदन बुझैना जनैले बा ।
केन्द्रीय प्रतिनिधि लेखक अँट्वारके घटनास्थलके अवलोकन, पीडित परिवारसे भेटघाट, स्थानीय जनप्रतिनिधिसे छलफल ओ घटनाके बारेम प्रहरीसे करल अनुसन्धानके विषयमे प्रदेश प्रहरी प्रमुखसे छलफल कैना कार्यक्रम रहल नेता लेखकके स्वकीय सचिव जनक भट्ट जानकारी डेलै ।
स्थलगत अध्ययन ओ टमान व्यक्तिसे छलफलपाछे नेता लेखक प्रतिवेदन पार्टीहे बुझैना उहाँ बटैलै । लेखकसे इहीसे आघे शनिच्चरके कांग्रेस जिल्ला समितिसे फेन छलफल करल रहे । कांग्रेससे नेता लेखकहे घटनाके सत्यतथ्य बुझ्न, घटनाके अध्ययन कैके डेखल विषयवस्तु समेटके पार्टीहे बुझैना जनाइल बा ।
घटनापश्चात टमान पार्टीके नेता, कार्यकर्ता घटनास्थल ओ पीडित परिवारहे भेट्ना क्रम चल्टी रहल बा । इहीसे आघे नेपाली कांग्रेस बैतडीके सभापति नरेन्द्रसिंह थापा, कांग्रेस डडेल्धुराके सभापति तथा प्रदेशसभा सदस्य कर्ण मल्ल, लीलाधर भट्ट, पूर्वअर्थराज्यमन्त्री दामोदर भण्डारी लगायतके नेता कार्यकर्ता घटनास्थलके अवलोकन ओ पीडित परिवारहे भेटल रहिट ।
भागरथी गत माघ २२ गते बलात्कारपाछे हत्या करल अवस्थामे स्थानीय लवलेक बनुवामे फेला परल रही । हालसम फेन अपराधी पत्ता लागे नैसेकल हुइट । नाटपाट हत्यारा पत्ता नैलागटसम शव नै बुझ्ना अडान रख्ले बावै । जिल्ला अस्पतालमे रहल शवहे सुरक्षित राख्न समस्या हुइटी रहल अस्पताल जनैले बा । यहोर प्रहरी भर अपराधीक लग्गे पुगल ओरसे हाली सार्वजनिक कैना जनैले बा ।
घटनापश्चात घटनाके अनुसन्धानके लाग सुदूरपश्चिम प्रदेश प्रहरी कार्यालयके प्रमुख प्रहरी नायब महानिरीक्षक उत्तमराज सुवेदी नेतृत्वके टोली करटी रहल बा ।
उ टोलीमे प्रदेश प्रहरी कार्यालयके वरिष्ठ उपरीक्षक जनकराज पाण्डे, केन्द्रीय अनुसन्धान ब्यूरोके प्रहरी नायब उपरीक्षक पञ्चकुमार बाँखुसहित प्राविधिक रहल बाटै ।
