ट्राफिक प्रहरी ओ सवारी चालकहे गुलाफ उपहार

पहुरा समाचारदाता
धनगढी, २ फागुन । सामाजिक कार्यमे सक्रिय युवाहरुको संस्था हेल्प फर हेप्पीनेस सुदूरपश्चिमसे सवारी चालक ओ ट्राफिक प्रहरीसंग प्रणय दिवस मनैले बा ।

प्रदेशके अस्थायी राजधानी धनगढीस्थित बसपार्कमे ‘प्रेम रुपहे नाही मानवताहे करी’ कना नारासहित ह्रदयके आँखा कार्यक्रम आयोजना करटी सवारी चालक, सह–चालक, एम्बुलेन्स चालक ओ ट्राफिक प्रहरीहे गुलाफ उपहार डेटी प्रणय दिवस मनाइल हो ।

हेप्पीनेसके सुदूरपश्चिम संयोजक घनश्याम भण्डारीके अध्यक्षतामे आयोजित कार्यक्रममे सार्वजनिक सवारीके चालक, सह–चालक ओ एम्बुलेन्स चालकहे गुलाफसंगे खादा ओढाके सम्मान करल बा कलेसे सक्कुहे चकलेट ओ किरिङफे प्रदान करल बा ।
ओस्टेक जिल्ला ट्राफिक प्रहरी कार्यालयमे कार्यरत ट्राफिक प्रहरीहे गुलाफ उपहार डेटी खादा ओढाके सम्मान करल बा । ट्राफिक व्यवस्थापनमे सहज होए कना उद्देश्यसे एक÷एक सिट्टीफे डेहल बा ।

सवारी चालकके ओरसे कार्यक्रमके वडका पहुना रहल नेपाल यातायात स्वतन्त्र मजदुर संगठनके सुदूरपश्चिम सचिव रामसिंह महरा सम्मानके लाग धन्यवाद ज्ञापन करलै ।
उहाँ प्रेमीप्रेमिकाबीच केल नइहुके मानव जातीसे एकदुसरहे प्रेम करे परठ कना सन्देश डेना करके आयोजित कार्यक्रमके प्रसंशा करलै कलेसे कार्यक्रमके खास पहुना रहल एम्बुलेन्स चालक संघ सुदूरपश्चिमके अध्यक्ष लक्ष्मण सिंहसेफे सम्मानके लाग धन्यवाद डेलै ।
खास पहुना जिल्ला ट्राफिक प्रहरी कार्यालयके ट्राफिक प्रहरी नायव निरीक्षक मोहनसिंह चैसिर सक्कु सवारी चालकहे यात्राके क्रममे भेटना यात्रुहे प्रेमवत व्यवहार कैना आग्रह करले बटै ।

उहाँ हेप्पीनेससे प्रेम दिवस मनैना गलत परम्पराहे तुरटी लौवा अभ्यासके सुरुवात करलमेफे धन्यवाद डेले बटै । संस्थाके संयोजक भण्डारी सवारी चालक, सह–चालक, एम्बुलेन्स चालक ओ ट्राफिक प्रहरीके जिम्मेवारी अपनमे महत्वपूर्ण रहल बटैलै ।
उहाँ सक्कुहुनप्रति सम्मान दर्शैटी कोरोना महामारीके बेलाफे फ्रन्ट लाइनमे खटके सर्वसाधारणहे सेवा डेहल स्मरण करटी धन्यवाद समेत डेलै ।

भण्डारी यात्राके क्रममे सवारी चालकसे महिला, बृद्धबृद्धा, शारीरीक रुपमे अशक्तहुकनहे उचित सम्मान डेना करल हुइलेसेफे कबु कबु समस्या भोगे परल गुनासो अइना हुइल ओरसे ओहोर ओरफे विशेष ध्यान डेना आग्रह करले बटै ।

कोभिडके बेला एम्बुलेन्स चालकसे संक्रमितहे निःशुल्क कोभिड अस्पतालसम पुगैना काम प्रसंशनीय रहलफे उहाँ उल्लेख करलै । हेप्पीनेससे यातायात मजदुर संगठन, एम्बुलेन्स चालक संघ ओ ट्राफिक प्रहरी कार्यालयहे मायाके चिनोफे प्रदान करले बा । कार्यक्रममे हेल्प फर हेप्पीनेस टिम सुदूरपश्चिमके आपतकालीन असहाय सहयोग कोष, मोटिभेसनल टिम ओ भेटनरी टिमके सदस्यके सहभागिता रहल रहे । यी आघे गैल वर्ष हेल्प फर हेप्पीनेससे कैलाली कारगारके कैदीबन्दीहुकनसंग प्रणय दिवस मनाइल रहे ।