पुरुष ओर वडा–६ फाइनल ओ वडा–३ सेमीफाइनल प्रवेश

पहुरा समाचारदाता
हसुलिया, २ फागुन । कैलालीके कैलारी गाउँपालिका–३ स्थित उत्तर भडरीमे हुइटी रहल टिसरा अध्यक्ष कप रनिङ्ग खेलकुद प्रतियोगिता अन्तर्गत अँट्वारके फेन ३ खेल हुइल बा ।
पुरुष ओर हुइल सेमीफाइनल खेलमे वडा नम्बर ६ विजयी हुइल बा । वडा नम्बर ६ से वडा नम्बर ५ हे २ के विरुद्ध ७ गोल कैटी विजयी हुइल हो । वडा नम्बर ६ के यूहन चौधरी ५ गोल, सागर चौधरी ओ किस्मत चौधरी १÷१ गोल करल रहिट । इ संगे वडा नम्बर ६ फाइनलमे प्रवेश करल मिडिया संयोजक मिशन चौधरी जानकारी डेलै । वडा नम्बर ५ के रमेश बोहरा ओ आयुष कठरिया १÷१ गोल घुमाइल रहिट ।
ओस्टके पुरुष ओर वडा नम्बर ३ से वडा नम्बर २ हे शुन्यके विरुद्ध २ गोल कैटी विजयी हुइल बा । वडा नम्बर ३ के टीम क्याप्टेन हेमन्त चौधरी ओ दिगम्बर चौधरी गोल करल रहिट । इ संगे वडा नम्बर ३ सेमीफाइनलमे प्रवेश करल मिडिया संयोजक चौधरी जानकारी डेलै ।
महिला ओर हुइल खेलमे वडा नम्बर ४ शुन्यके विरुद्ध १ गोल कैटी सेमीफाइनलमे प्रवेश करले बा । वडा नम्बर ४ के खेलाडी मोनिका चौधरी १ गोल कैके आपन टीमहे सेमीफाइनलमे प्रवेश कराइल हुइटी ।