धनगढीके कोरोना अस्पताल खाली

पहुरा समाचारदाता
धनगढी, ५ फागुन । कैलालीके धनगढीस्थित सेती अस्पतालके कोरोना अस्थायी अस्पताल खाली हुइल बा । कुछ महिना आघेसम कोरोना संक्रमितसे खचाखच रहना अस्पताल अब्बे खाली हुइल लागल हो । लावा संक्रमण दर घटलपाछे अस्पताल खाली हुइल अस्पताल जनैले बा ।

कोरोना भाइरससे महामारीके रुप लेहल बेला प्रदेश सरकारके लगानीमे ५० शैयाके अस्थायी अस्पताल निर्माण करल रहे । पाछेक समय कोरोना संक्रमण ओ परीक्षण दर घटलसंगे अस्पताल खाली हुइल सेती प्रादेशिक अस्पतालके सूचना अधिकारी दिलिपकुमार श्रेष्ठ बटैलै ।

अस्पतालमे बिरामीके संख्या घटलपाछे अस्पताल परिसर सुनसान बनल बा । सोम्मारके सेती प्रादेशिक अस्पतालके प्रयोगशालामे ४७ ठो नमूना परीक्षण हुइल बा । जौन मध्ये एक जनहनमे कोरोना संक्रमण पुष्टि हुइल सूचना अधिकारी श्रेष्ठ बटैलै ।

कोरोना भाइरसविरुद्धके खोप अभियान सुरु हुइलपाछे मनैन्के पहिलेक जस्टे कोरोनाके त्रास नैहो । संक्रमण दर घट्टी जाके जनजीवन फेन सामान्य हुइटी गैल बा । मनैनके निर्बाध रुपमे आ–आपन कामकाजमे व्यवस्त हुइटी रहल बाटै ।