भागरथीके बलात्कारपाछे हत्याके अभियुक्त सार्वजनिक
घरायसी रिसिबीके कारण बलात्कार ओ हत्या
पहुरा समाचारदाता
धनगढी, ५ फागुन । बैतडीके १७ वर्षिया किशोरी भागरथी भट्टके बलात्कारपाछे हत्या करल अभियोगमे पक्राउ परल अभियुक्तहे बुधके राजे प्रहरी सार्वजनिक करले बा ।
दोगडाकेदार गाउँपालिका–७ के भागरथीके बलात्कारपाछे हत्या करल अभियोगमे पक्राउ परल १८ वर्षिय दिनेश भट्टहे पत्रकार सम्मेलन कैके सार्वजनिक करल हो । जिल्ला प्रहरी कार्यालय बैतडीमे आयोजित पत्रकार सम्मेलनमे सुदूरपश्चिम प्रदेश प्रहरी कार्यालयके प्रमुख प्रहरी नायब महानिरीक्षक उत्तमराज सुवेदी भट्ट भागरथीके बलात्कारपाछे हत्या करल बटैलै ।
भागरथी अध्ययनरत सनातन धर्म माध्यमिक विद्यालयमे कक्षा ११ मे पह्रुइया दिनेश माघ २१ गते भागरथीके पिछा कैटी लवलेक सामुदायिक बनुवामे अक्के रहल मौका छोपके हत्या करल खुलल् उहाँ बटैलै ।
ओहकान अनुसार आरोपी भट्टके शंकास्पद गतिविधि, प्राविधिक पक्षके विश्लेषण, लोकेसन, प्रत्यक्षदर्शी ओ बयानके आधारमे भागरथीके हत्यामा संलग्न हुइल आशंकामे पक्राउ कैके सार्वजनिक करल हो ।
हत्याके घटना सार्वजनिक हुइलपाछे डीआईजी सुवेदी अपनहे बैतडी पुगल रहिट । घटनाके अनुसन्धानके लाग प्रदेश प्रहरी कार्यालयके एसएसपी जनकराज पाण्डे, केन्द्रीय अनुसन्धान ब्युरो सीआईबीके प्रहरी नायब उपरीक्षकके टोली फेन खटाइल रहे ।
घरायसी रिसिबीके कारण बलात्कार ओ हत्या
पक्राउ परल भट्ट घरायसी रिसिबीके कारण बलात्कारपाछे घाँटी थिचके हत्या करल बयान डेले बाटै । भागरथी अध्ययनरत दोगडाकेदारके सनातन धर्म माध्यमिक विद्यालयमे कक्षा ११ पर्हना भट्ट प्रहरीहे बयान डेना क्रममे कहले बाटै, ‘भागरथी ओ मोर परिवारबीच पहिलेसे घरायसी रिसिबी रहे । उहे कारण मै ओहकान बलात्कारपाछे घाँटी थिचके हत्या करल हुइटुँ ।’
उहाँ भागरथीहे पहिले भिरसे गिराइल ओ पाछे बलात्कार कैके हत्या करल स्वीकार करल रहिट । उहाँ भागरथीके हत्या कैना एकल योजनामे अपने पहिलेसे रहल उल्लेख करटी उचित मौकाके पर्खाइमे बैठेल समेत बटाइल रहिट ।
प्रदेश सरकारके ५ लाख डेना निर्णय
बैतडीके भागरथी भट्ट ओ बझाङके सम्झना बिकके परिवारहे सुदूरपश्चिम प्रदेश सरकार पाँचपाँच लाख रकम सहयोग कैना निर्णय करले बा ।
मंगरके बैठल प्रदेश सरकारके मन्त्री परिषद्के बैठकसे पीडित परिवारहे पाँचपाँच लाख सहयोग कैना निर्णय करल हो । बैतडीके दोगडाकेदार गाउँपालिका–७ चडेपानीकी १७ वर्षीया भागरथीके इहे माघ २१ गते बलात्कारपाछे हत्या करल रहे कलेसे बझाङके १२ बर्षिया बालिका सम्झनाके गत कुवाँरमे बलात्कारपाछे नै हत्या हुइल रहे ।
प्रहरी अधिकृतहे फुलमालासे विदाई
भागरथीके बलात्कारपाछे हत्या करुइया व्यक्तिहे कानूनके कठघरामे लानल कहटी दोगडाकेदार गाउँपालिकाके स्थानीय प्रहरीहे सम्मानसहित विदा करले बाटै ।
घटनाके अनुसन्धानके लाग खोचलेक प्रहरी चौकीमे रहल सुदूरपश्चिम प्रदेश प्रहरी कार्यालयके प्रमुख प्रहरी नायब महानिरीक्षक उत्तमराज सुवेदी, प्रहरी वरिष्ठ उपरीक्षक जनकराज पाण्डे, केन्द्रीय अनुसन्धान ब्युरोके प्रहरी नायब उपरीक्षक पञ्चकुमार बाखुसहितके प्रहरीके स्थानीय फूलमाला सहित विदाइ करल हुइट ।
उहाँहुक्रे जघन्य अपराधके घटनाके दोषीके पहिचान कैके कारवाहीके दायरामे लानलमे प्रहरी अधिकृतहुक्रनहे धन्यवाद समेत डेले बाटै । बैतडीके दोगडाकेदार गाउँपालिका–७ के १७ वर्षीया किशोरी भागरथी भट्ट गत माघ २१ गते विद्यालयसे अइना बेला बेपत्ता हुइल रही ।
डोसर सकारे माघ २२ गते उहाँ स्थानीय लवलेक सामुदायिक वनुवामे मृत अवस्थामे फेला परल रही ।
न्यायके लाग अभियुक्त फेन दैनिक प्रर्दशनमे सहभागी
भागरथीके बलात्कारपाछे हत्या करल अभियोगमे पक्राउ परल दिनेश भट्ट ओहकान न्याय मग्टी हुइना प्रर्दशनमे समेत दैनिक जैसिन सहभागी हुइना करल खुलल् बा ।
सनातन धर्म माध्यमिक विद्यालयमे अध्ययनरत उहाँ भागरथीके न्यायके लाग स्थानीय खोचलेक बजारसहितके ठाउँमे करजैना प्रर्दशनमे उहाँ सहभागी हुइना करल प्रहरी जनैले बा । मने प्रर्दशनके क्रममे डेखैना शंकास्पद गतिविधिके कारण प्रहरी सुरुसे नै निगरानीमे राखके ओहकान गतिविधि अध्ययन करटी रहल रहे ।
मृतक भागरथीके परिवार समेत ओहकानउपर आशंका करल कारण निगरानी बह्राइल प्रहरीे अन्ततः उहाँनै बलात्कारपाछे भागरथीके हत्या करल स्वीकार रहिट ।
