बिवाईसी पिपुल्स च्वाईस अवार्डके मनोनयन सार्वजनिक

पहुरा समाचारदाता
धनगढी, ५ फागुन । धनगढीमे हुइना दुसरा कैलाली अस्पताल सुदूरपश्चिम स्पोर्टस अवार्डके एक ठो विधा बिवाईसी पिपुल्स च्वाईस अवार्डके मनोनयन सार्वजनिक करल बा ।

वर्ष २०७६ मे वर्षभरके प्रदर्शन ओ लोकप्रियताके आधारमे उत्कृष्ट तीन खेलाडीके मनोनयन सार्वजनिक करल अवार्ड आयोजक नेपाल खेलकुद पत्रकार मञ्च कैलाली जानकारी डेले बा । पिपुल्स च्वाईस अवार्डके मनोनयनमे परुइयामे पौडीके गौरिका सिंह, क्रिकेटके अन्जली चन्द ओ भलिबलके सरस्वती चौधरी बटै ।

दुसरा सुदूरपश्चिम स्पोर्टस अवार्डके मुख्य प्रायोजक कैलाली अस्पतालके अध्यक्ष जनकराज जोशी, लाईफटाईम अचिभमेन्ट अवार्ड विधा प्रायोजक सारथी अस्पतालके अध्यक्ष वेदप्रकाश जोशी ओ स्पेशल अवार्ड विधा प्रायोजक न्यु सिटी पोलि क्लिनिकके सञ्चालक भरत कुँवर मनोनयन सार्वजनिक करलै । सुदूरपश्चिम ओ मध्यपश्चिममे ै पहिल चो सबसे ढेर धनराशीके फुटबल प्रतियोगिता आयोजना कैना वनदेवी युवा क्लबके अध्यक्ष सुसन जोशी यी विधाहे प्रायोजन करके साथ डेलै । उहे हुके यी बिधाके नाउ बिवाईसी पिपुल च्वाईस अवार्ड रहल बा ।

विजेताके घोषणा सर्वसाधारणसे एसएमएस ओ फेसबुक मार्फत तथा खेलकुद पत्रकार ओ प्रशिक्षकके मतके आधारमे हुई । फेसबुकमे भोटके लाग सुदूरपश्चिम स्पोर्टस अवार्डके आधिकारिक पेजमे जाके लाईक करे सेक्ना मञ्चके महासचिव तथा अवार्डके संयोजक प्रदीप पाठक पत्रकार सम्मेलनमे जानकारी डेलै । उहाँक अन्सार सुदूरपश्चिम स्पोर्टस अवार्डके फेसबुकमे जाके अपनहे मनपर्ना खेलाडीके प्रोफाईलमे लाईक करे सेक्नाम व्यवस्था करल बा । तीनु जाने खेलाडीनके तीन ठो फोटो एक्के चो डारल प्रोफाईल ओ अलग अलग डारल प्रोफाईलमे जाके लाईक करे सेक्ना पाठक बटैलै । दुनु फोटुमे करल लाईक गणना हुई ।

मोबाईल भोटिङके लाग मनोनयनमे परल खेलाडीके कोड बनाइल बा । एसएमएसके लाग गौरीका सिंहहे १, अन्जली चन्दहे २ ओ सरस्वती चौधरी ३ नम्बर कोड डेहल बा । मोबाईलके म्यासेज बक्समे जाके एसएसए लिखके एक स्पेसपाछे मन परल खेलाडीके कोड १, २ वा ३ लिखके ३८६८७ मे एसएमएस करे सेक्जाई । भोटिङ लाईन बुधसे सुरु हुके चैत ४ गते रात १२ः०० बजेसम खुला रही । एसएमएस भोटिङके मतभार ५० प्रतिशत रही । फेसबुक पेजके २५ प्रतिशत ओ पत्रकार, प्रशिक्षकके मतभार २५ प्रतिशत रही ।

अवार्डके उत्कृष्ट खेलाडी पुरुष ओ महिला, उत्कृष्ट प्रशिक्षक, पिपल्स च्वाइस अवार्ड करके ४ विधाके विजेताहे नगद ३० हजार सहित ट्रफी मेडल ओ प्रमाणपत्र, वर्ष युवा खेलाडी, स्पेसल अवार्ड, लाईफ टाइम एचिभमेन्ट अवार्डके विजेताहे नगद २५ हजार सहित ट्रफी मेडल, प्रमाण पत्र डेजाई ।

ओस्टेक सुदूरपश्चिम आईकन महिला ओ पुरुष विधाके विजेताहे नगद २० हजार सहित ट्रफी मेडल, प्रमाणपत्रके साथे टमान विधाके विजेताहे गिफ्ट ह्याम्पर प्रदान कैना आयोजक जनैले बा । अवार्ड कार्यक्रम डिसहोम एक्सन स्पोर्टस ओ धनगढीके स्थानीय संचार माध्यमसे प्रत्यक्ष प्रसारण कैना बटाइल बा ।