धनगढी पोलिटेक्निक, साडा ओ होटल व्यवसायी संघ विच सहकार्यके लाग सम्झौता
पहुरा समाचारदाता
धनगढी, ६ फागुन । धनगढी उप–महानगरपालिका, प्राविधीक शिक्षा तथा व्यावसायिक तालिम केन्द्रके साझेदारीमे संचालित धनगढी पोलिटेक्निक इन्स्टिच्यूटसे सुदूरपश्चिम अटोमोवाईल्स डिलर्स एसोसिएशन ओ होटल व्यवसायी संघ कैलालीसंग सहकार्यके लाग सम्झौता करले बा ।
बिफेक रोज धनगढी उप–महानगरपालिकाके नगरप्रमुख नृपबहादुर वड, सुदूरपश्चिम अटोमोवाईल्स डिलर्स एसोसिएशनके अध्यक्ष पुष्कर ओझा ओ होटल व्यवसायी संघ कैलालीके अध्यक्ष कलम बम विच साझेदारीपत्रमे हस्ताक्षर हुइल हो । धनगढी पोलिटेक्निक इन्स्टिच्यूट स्थानीयतहसे अपनही संचालन करल काठमाण्डौ उपत्यका बाहिरके पहिल शिक्षालय हो नगरप्रमुख वड कहलै, ‘टबमारे यिहीहे फरक तरिकासे संचालन करे खोजल बटी ।’
नगरप्रमुख वड सुदूरपश्चिम अटोमोवाईल्स डिलर्स एसोसिएशन ओ होटल व्यवसायी संघ कैलाली संग प्रशिक्षर्थीहुकनके प्रयोगात्मक अभ्यास, प्राविधिक जनशक्तिके उपलब्धता, तालिम, सिप तथा प्रविधीके हस्तान्तरण जैसिन विषयमे सहकार्य हुइना बटैलै ।
सुदूरपश्चिम अटोमोवाईल्स डिलर्स एसोसिएशनके प्रदेश अध्यक्ष पुष्कर ओझासे धनगढी उप–महानगरपालिकाके संचालन करल धनगढी पोलिटेक्निकसंग हुइल सम्झौताहे प्रभावकारी रुपमे कार्यान्वयनमे नन्ना बटैलै । हम्रहिनसे अब्बेफे अटोमोवाईल क्षेत्रके प्राविधीकहुकनके अभाव बा उ यी शिक्षालयसे उत्पादन हुइना आशा रख्ले बाटी ।
होटल व्यवसायी संघ कैलालीके अध्यक्ष कलम बम बहुट महत्वपूर्ण सम्झौता रहल बटैलै । अध्यक्ष बम संस्थागत रुपमे हुइल सम्झौताहे कार्यान्वयनमे आजुक मितिसे कार्यान्वयनमे नन्ना बटैलै ।
