पत्रकार उन्नती चौधरीहे ‘रोटरी जर्नाे अवार्ड’
पहुरा समाचारदाता
धनगढी, ८ फागुन । कैलालीसे संचालित केर्नी न्यूज डटकमके सम्पादक उन्नती चौधरी ‘रोटरी जर्नाे अवार्ड’ पत्रकारिता पुरस्कार वर्ष सन् २०१९–२० से पुरस्कृत हुइल बटी ।
रोटरी इन्टरनेशनल डिष्ट्रिक्ट ३२९२ के डिष्ट्रिक्ट गर्भनर किरणलाल श्रेष्ठके अन्सार शुकके रोज काठमाडौंमे आयोजित एक कार्यक्रममे यी अवार्डसे सुदूरपश्चिम प्रदेशसे पत्रकार चौधरीसहित प्रत्येक प्रदेशके एक–एक जाने करके सात पत्रकार ओ शिक्षा, स्वास्थ्य, वातावरण तथा महिला बालबालिकालगायत पाँच विधामे निरन्तर कलम चलुइया पाँच पत्रकार पुरस्कृत हुइल बटै ।
पुरस्कारके राशि जनही रु २५ हजार रहल बा । यी अवार्डसे आर्थिक पत्रकारिता क्षेत्रसे पुष्पराज आचार्य, वातावरण पत्रकारिता क्षेत्रसे टीका वन्धन, शिक्षा पत्रकारिताओर दीपेन्द्रप्रसाद सिंह, स्वास्थ्य क्षेत्रसे सम्झना महर्जन, महिला सञ्चारकर्मीओर विनिता रिजाल पुरस्कृत हुइल बटै ।
ओस्टेक प्रदेशअन्तर्गत विनु तिमिल्सिना, श्याम बन्जारा, कमला हमाल, दीपेन्द्र श्रेष्ठ, लक्ष्मी आचार्य ओ भीमबहादुर सिंह पुरस्कृत हुइलै ।
उहे कार्यक्रममे रोटरी इन्टरनेशनल डिष्ट्रिक्ट ३२९२ नेपालसे स्थापना करल ‘बासु रोटरी भोकेशनल अवार्ड अन गुड गर्भनेन्स’ खोजी पत्रकारिता पुरस्कारसे छापा माध्यमके ओरसे आर्थिक दैनिकके सम्पादक प्रल्हाद रिजाल ओ अनलाइन माध्यमके ओरसे हाम्रा कुरा डटकम अनलाइनके सम्पादक अजयबाबु शिवाकोटी पुरस्कृत हुइलै । यी पुरस्कारके राशि जनही पाँच लाख रहल बा ।
