‘दासता विरुद्धके विद्रोह रोकके नैरुकी’
पहुरा समाचारदाता
हसुलिया, १६ फागुन । थरुहट थारुवान राष्ट्रिय मोर्चाके केन्द्रिय संयोजक लक्ष्मण थारु दासता विरुद्धके विद्रोह कोइ रोके खोज्लेसे फेन नै रोके सेक्ना बटैले बाटै ।
शनिच्चरके कैलालीके हसुलियामे हुइल ‘शान्ति सद्भाव न्याय ओ अधिकारके लाग दासता विरुद्धके थरुहट थारुवान विशेष राष्ट्रिय सम्मेलन’ मे आपन भ्वाइस रेकर्ड कैके सम्मेलनहे सम्बोधन कैटी संयोजक थारु दासता विरुद्धके विद्रोह आब कोइ फेन रोके नैसेक्ना बटाइल हुइट ।
संयोजक थारु कहलै– ‘उच्च अदालत दिपायलसे नश्लीयपूर्ण, पूर्वाग्राही, गद फैसला सुनाके जन्मकैदके फैलाला सुनैले बा, आज इ सभामे इ विशेष राष्ट्रिय सम्मेनल हुइटी रहल बेला थुप्रे सिआइडी पठाके, प्रशासन पठाके महिल इ मञ्चमे अइनासे वञ्चित कराइल बा । आज महिन गिरफ्तार कैना आदेश बा, हत्कडी लगैना आदेश बा, आज महिन जेलमे डर्ना आदेश बा । बाध्यताबस मै इ मञ्चमे आइ नैसेक्नु । विश्वास बा इ सम्मेलन भव्यताके साथ सफल हुइना बा ।’
उहाँ आघे बोल्टी कहलै, ‘हम्रहीनहे लेखेबर, बोलेबर, संगठित भेला हुइबर ओ सम्मेलन करेबर इ देशके शासकहुक्रे आतंककारी कहठै्, ज्यानमारा कहठै्, हम्रहीनहे लुटेरा डाँकाके व्यवहार करठै ।
नेपाली नागरिकके व्यवहार नैकरठै । ओ हम्रहीनहे बोल्नसे वञ्चित करठै । मने आब नै रुकब । इ हमार भेला संगठन, हमार एकता, हमार अभियान ओ हमार आन्दोलन दासता विरुद्धके विद्रोके तयारी नैरुकी, को रोक्लेसे फेन नैरुकी । प्रशासनके धाक धम्की त्रास हमारउपर झुठा मुद्धा, सांसद रेशम चौधरीउपरके जन्मकैदके फैसला हम्रे मान्न तयार नैहुइ ।’
उहाँ आघे कहलै– ‘हम्रे बोल्ली, हम्रे अपराधी नैहुइटी, ज्यानमारा नैहुइटी हम्रे इ देशमे सदभाव विगरुइया जत्था नैहुइटी । हम्रे इ देशके आदिवासी धर्तीपुत्र हइटी । इ देशके सबसे इमान्दार समुदाय हुइटी । टीकापुर घटना थारु नै घटैले हुइटै । हम्रे किल नै बोलठुइटी, नेपाली कांग्रेस, नेकपा, जसपा लगायतके स्वतन्त्र थारुहुक्रे बोल्टीरहल बाटै । थारुन उपर झुठा मुद्धा लगाइल बावै ।’
संयोजक थारु सम्मेलनमे अपने भौतिक रुपमे उपस्थित हुइ नैसेक्लेसे फेन लिम्बुसे मगरात ओ खसान नेवा लगायतके अभियान्ताहुक्रनहे जुर्मुराइल डेखके अपने खुशी रहल बटैलै । साथे संयोजक थारु आबके आन्दोलनमे लिम्बुवान, खम्बुवान, ताम्सालिङ, मगरात, नेवा, दलित ओ अन्य पार्टी संगठित ओ मोर्चा बन्दी किल नैकैके सशक्त आन्दोलनमे उत्रना चेतावनी डेलै ।
पूर्वमन्त्री तथा नेपाली काँग्रेसका केन्द्रीय सदस्य डा. गोपाल दहित टीकापुर घटना राजनीतिक घटना रलेसे फेन थारुनउपर दमन कैके राज्यसे निर्दोष थारुनहे पक्राउ कैके मुद्दा लगाइल टिप्पणी करलै । तत्कालिन सरकारसे टीकापुर घटना राजनीतिक आन्दोलन हो कहटी मुद्दा खारेज कैना निर्णय करलेसे फेन कार्यान्वयनमे नैआइल बटैलै । टीकापुर घटनामे पीडितके लाग साढे १३ करोड रुपियाँ क्षतिपूर्तिके निर्णय अपने सरकारमे रहल बेला फेन कराइल उहाँ बटैलै ।
थरुहट थारुवान मोर्चासे उठाइल मुद्दा सम्बोधनमे आपन साथ समर्थन रहल कहटी डा. दहित कहलै– ‘पार्टीभिट्टर अन्तरसंघर्ष कैटी टीकापुर घटनाहे राजनीतिक मुद्दा बनाके जेलबन्दीहे रिहाई कराइ परल ।’ पहिचान पक्षीय सक्कु जनहनसे सहकार्य कैके राज्यहे दवाव डेनाके विकल्प नैरहल उहाँ बटैलै ।
मोर्चाके केन्द्रीय प्रवक्ता मिनराज थारु वर्तमान संविधानसे थारुनहे विभेद कायमे राखल ओरसे संशोधन नैकरटसम चुप लागके नैबैठ्ना बटैलै । थारुनउपर राज्यसे सदियौंसे विभेद करटी आइल ओरसे आब चुप लागके नैबैठ्ना, विभेदके पर्खाल भत्काके छोर्ना चेतावनी डेलै ।
संघीय लोकतान्त्रिक राष्ट्रिय मञ्चके अध्यक्ष कुमार लिङ्देन थरुहटके आन्दोलनमे लिम्बुवानके साथ रहल बटैलै । टीकापुर घटना औरेजे रचल षडयन्त्र रहल ओरसे थारुनहे दुःख डेहे नैमिल्ना उहाँ बटैलै । टीकापुर घटनाहे अन्तर्राष्ट्रियकरण कैके ओकर पर्दाफास करे पर्ना बटैलै । टीकापुर घटनामे पक्राउ परके कारागारमे रहल सक्कु थारुनहे विना शर्त रिहाई करे पर्ना उहाँ माग करलै ।
नेपाल आदिवासी जनजातिका पूर्व महासचिव आङकाजी शेर्पा पञ्चायतकालसे थारु कल्याणकारिणी सभा संघीयताके बात उठाइल चर्चा करलै । उहे मुद्धा उठाइबर थारुहुक्रे पहिचानके आधारमे थरुहट थारुवान प्रदेश चाहल कलेसे प्रदेश नैडेना ओ उहे थारुनहे ओकर आदिमभूमिसे निकरक लाग बाँके बर्दिया निकुञ्ज खोल्न, चितवन राष्ट्रिय निकुञ्ज खोल्न शेर्पाहुक्रनके आदिभूमिमे सागरमाथा राष्ट्रिय निकुञ्ज राखल अरोप लगैलै । उहाँ पूर्व मेचीसे पश्चिम महाकालीसम बसोबास रहल थारु समुदायके युवाहुक्रनके सेना, प्रहरी ओ सशस्त्र प्रहरीमे समानुपातिक प्रतिनिधित्व हुइ पर्ना बटैलै ।
मगरात संघर्ष समितिके संयोजक राम मगर आब पार्टीसे उप्पर उठके जातीय सचेतना आवश्यक रहल बटैलै । पार्टीभिट्टर लागके योगदान डेहेबर फेन आदिबासी जनजातिके भलाई नैहुइना कहटी उहाँ आब जातीयरुपमे आघे बह्रना आवश्यक रहल बटैलै ।
कार्यक्रममे पूर्व स्वास्थ्यमन्त्री रामजनम चौधरी, सजपाके राजेन्द्र महतो, मोर्चाके सल्लाहकार गणेशमान महतो, प्रभा चौधरी लगायत धारणा राखल रहिट । ओस्टके थारु लोक गायक मनिराम चौधरी लगायतहुक्रनसे सांस्कृतिक प्रस्तुती फेन पस्तुत करगिल रहे ।
उहीसे आघे मोर्चाके केन्द्रीय युवा संयोजक सीताराम थारुके नेतृत्वमे थारु दस्ताहुक्रनसे हसुलिया बजारसे सुमीनाला हुइटी मञ्चसम मार्चपास फेन करल रहे । कार्यक्रममे हाजारौँके सहभागिता रहल रहे ।
