राजी बस्तीमे होमस्टे सञ्चालन
सुर्खेत, २० फागुन । कर्णाली प्रदेशके राजधानी वीरेन्द्रनगरमे लोपोन्मुख राजी समुदायसे होमस्टे सञ्चालन करले बटै । अल्पसंख्यक राजी समुदायके मौलिक पहिचान जर्गेना कैना उद्देश्यसे होमस्टे सञ्चालनमे नानल हो ।
वीरेन्द्रनगर–१०, दीपनगरस्थित राजी बस्तीमे सञ्चालन करल होमस्टेमे पाहुनाहे राजी जातिके परम्परागत खानाके परिकार खवाजाइठ कलेसे राजी संस्कृति अवलोकन कैना सेक्जाई ।
सुर्खेतमे रहल राजी समुदायके रहनसहन भेषभुषा ओ संस्कृति फरक रहल कारण पर्यटक प्रवर्द्धन करेक लाग होमस्टे सञ्चालनमे नानल लोपोन्मुख सीमान्तकृत समाज उत्थान नेपालके अध्यक्ष एवं होमस्टे सञ्चालक लालबहादुर राजी बटैठै ।
होमस्टेके कर्णाली प्रदेश सरकारके उद्योग, वन, पर्यटन तथा वातावरण मन्त्री नन्दसिंह बुढा उदघाटन करले रहिट । मन्त्री बुढा कर्णाली प्रदेशमे आम्दानीके क्षेत्रमध्ये कम लगानीमे ढेर मुनाफा लेहे सेक्ना क्षेत्र पर्यटन हुइल बटैलै ।
पर्यटकहुकनके लाग भारी होटल सञ्चालन नइआइल अवस्थामे होमस्टेहे प्रोत्साहन कैना नीति प्रदेश सरकारसे लेहल उहाँ दावी करलै ।
होमस्टे सञ्चालक राजीसे राजी होमस्टेसे लोपउन्मुख जातिके संस्कृतिके प्रचार प्रसार कैनाफे बटैलै । ‘फरक संस्कृति रहल ओ फरक पहिचान बोकल राजी समुदायके संस्कृति, खानपानके विषयमे जानकारी डेजाई,’ उहाँ कहलै ।
