हत्यामे संलग्ना प्रेमिका सार्वजनिक
दुसरओर लागल आरोप लगैटी हत्या
पहुरा समाचारदाता
धनगढी, २१ फागुन । कैलाली गोदावरी नगरपालिका वडा नम्बर ५ गेटी स्थित गेटा आँखा अस्पताल लग्गे बैठुइया बर्ष ३५ के छोटु कना शिवचरण रानाके हत्यामे संलग्ना उहाँक प्रेमिकाहे पक्राउ करके प्रहरी सार्वजनिक करले बा ।
विफेक रोज पत्रकार सम्मेलनके आयोजना करके हत्यामे संलग्ना ३७ बरसके जयन्ती चौधरीहे सार्वजनिक करल हो । उ हत्या काण्डके मुख्य योजनाकार जयन्ती रहल ओ हुकान निर्देशन तथा संलग्नतामे और दुई जाने ब्यक्तिसे घटना घटाइल प्रारम्भिक अनुसान्धानमे विल्गाइल जिल्ला
प्रहरी कार्यालय कैलालीके प्रहरी प्रमुख प्रहरी उपरीक्षक अनुपम शमशेर जबरा बटैलै ।
यिहे फागुन १५ गते सकारे ४ से ५ बजेक समयमे जिल्ला कैलाली गोदावरी नगरपालिका वडा नम्बर ५ गेटीस्थित गेटा आँखा अस्पताल लग्गे उहे बैठुइया छोटु कना शिवचरणके मुरीमे धरियार वस्तु प्रहारसे कैके हत्या करके गेटासे श्रीपुर जैना डगरके निर्माणाधिन नालीके खोल्टामे लाश फेला परल रहे ।
घटनाके प्रकृति, मृतक तथा अभियुक्तसे प्रयोग करटी आइल फोनके डिटेल्स, वारदात पुर्वके सम्बन्ध, रिसिईबी समेतके तथ्य संकलन तथा बिश्लेषण करेबेर जयन्ती मुख्य योजनाकार विल्गाइल प्रहरी उपरीक्षक पत्रकार सम्मेलनमे जानकारी डेलै ।
छोटु ओ अभियुक्त जयन्तीके सम्बन्ध
मृतक छोटु कना शिवचरण राना ओ अभियुक्त जयन्ती चौधरीके गेटा आँखा अस्पताल आघे बिगत नम्मा समयसे खोका पसल रहेबेर दुई जानेक बिचके सम्बन्ध लग्गे हुइल रहे ।
समयक्रम अन्सार ओइनके विच सम्बन्ध अनैतिक सम्वन्ध हुइल विल्गाइल ओ गाँउ समाजके भद्रभलादिमी बैठके छलफल करके दुई रुप्या लाख लेनदेन करके दुनु जानके बिच मेलमिलाप हुइल प्रहरी पत्रकार सम्मेलनमे जनैले बा ।
कुछ समय छोटु कना शिवचरण ओ जयन्ती चौधरी बिचमे कौनो सम्बन्ध नइहुइल ओ कुछ समय पश्चात फेरसे सम्बन्ध बनाके लग्गे हुइल, यी सम्बन्धमे दुनु पक्ष बिच कबु कबु झगडा हुइना, एकजे दुसरप्रति शंका रख्ना, एकजे दुसरहे बिश्वास करठ की नइकरठ कहिके परीक्षण कैना लगायत आर्थिक लेनदेन कैना कार्य समेत हुइटी आइल प्रहरी जनैले बा ।
मृतक छोटु कना शिवचरण अपने बाहेक औरे महिलासंग सम्बन्ध राखल जानकारी जयन्ती चौधरी(बाँकी ३ पेजमे) पाके विक्षिप्तहुके अपने अपमानित हुइल, अपनप्रति ईमान्दार नइहुइना कना विश्वास लागलपाछे अभियुक्त जयन्तीमे बदलाके भावनासे मृतकहे मर्नासमके सोच आइल पत्रकार सम्मेलनमे जनाइल बा ।
अभियुक्त जयन्ती यी घटना पुर्व अपनही घटैना प्रयास करलमे अपनसे काम पुरा हुई नइसेकलपाछे अपन आफन्त नाता पर्ना पुरुष व्यक्तीसंग सम्पर्क करके योजना बनाके रकमसमेत डेहल खुले आइल जनागिल बा । रकम कटरा कना भर प्रहरी खुलाई नइचाहल ।
मृतक अपन पसलसे घर अइना जइना समय, प्रयोग कैना डगर ओ सवारी साधनके बारेमे जयन्ती घटना संलग्न आफन्त पुरुष व्यक्तीहे जानकारी डेहल रहिट । वारदात पुर्व कुछ समय आघे जयन्तीके नाता पर्ना पुरुष व्यक्ती उ वारदात घटैना प्रयास करल मने सफल नइहुइल प्रहरी जनैले बा ।
गैल फागुन १४ गते जयन्ती ओ हुकानक नाता पर्ना पुरुष व्यक्ती बिच टेलिफोन सम्पर्क हुके दुसर सकारे १५ गते जैसिक फे छोटुहे मारम कना योजना बमोजिम जयन्तीके योजना तथा निर्देशन बमोजिम सकारे ४ से ५ बजेके बिचमे घटना घटाइल हो ।
घटनामे संलग्न और फरार अभियुक्तहुकनके खोजी कार्य जारी रहल प्रहरी उपरीक्षक कार्यालय प्रमुख अनुपम शमशेर जबरा बटैलै ।
