जन्मदिनके अवसरमे तेजु खड्का स्मृति कोषके लाग सहयोग
पहुरा समाचारदाता
धनगढी, २१ फागुन । नेपाली कांग्रेसके यूवा नेता एवम् धनगढी उपमहानगरपालिकाके नगरप्रमुख नृपबहादुर वड प्रेस युनियन डोटी शाखासे स्थापना करल ‘तेजु स्मृति अक्षय कोष’ स्थापनाके लाग आर्थिक सहयोग घोषणा करले बटै ।
धनगढी उपमहानगरपालिकाके नगर प्रमुख वड अपन जन्मदिनके अवसरमे ११ हजार १ सय ११ रुप्या सहयोग करल हुइट । प्रेस स्वतन्त्रता मैंत्री व्यहावहार रहल नगरप्रमुख वड पत्रकारके स्मृतिमे स्थापना करल अक्षयकोषके लाग सहयोग कैना पहिल जनप्रतिनिधि हुइट । जनप्रतिनिधिसे जन्मदिनके अवसरमे अक्षयकोषके लाग सहयोग कैना नगरप्रमुख वड पहिल व्यक्ति हुइट ।
नेपाल प्रेस युनियन डोटी शाखाके संस्थापक अध्यक्ष स्वर्गीय तेजबहादुर खड्का (तेजु)के स्मृतिमे डोटी शाखासे यी कोषके स्थापना करल रहिट । कोषके लाग टमान पत्रकार तथा राजनीतिज्ञहुक्रे जन्मोत्सवके अवसरमे सहयोग करटी आइल बटै । हालसम कोष स्थापनाके लाग डेढ लाख ढेर रकम संकलन हुइल शाखाके सचिव पवन महरा जानकारी डेलै ।
प्रेस युनियनसे स्वर्गीय पत्रकार खड्काके स्मृतिमे अक्षयकोष स्थापना करके उ कोषसे राष्ट्रिय पत्रकारिता पुरस्कारके स्थापना कैना लक्ष्य लेहल बा । जेकर लाग शाखासे टमान व्यक्ति, संघसंस्थासंग सहयोगके आह्वान करल प्रेस युनियन डोटीके अध्यक्ष प्रकाश बम बटैलै ।
पत्रकार खड्का बाजुराके बुढीनन्दा धार्मिक तथा पर्यटकीय स्थलके रिपोर्टिङ्ग करके लौटना क्रममे बेपत्ता हुइल रहिट । बेपत्ता हुइल खड्काके तीन बर्षपाछे केल कंकाल भेटल रहे । जेकर डिएनए ओ घटना स्थलमे भेटल सामग्रीके आधारमे उहाँक मृत्यु हुइल पुष्टि हुइल रहे ।
स्वर्गीय पत्रकार खड्का नम्मा समय रेडियो नेपाल क्षेत्रीय प्रशारण केन्द्र दिपायलमे कार्यरत रहिट । उहाँ लोकप्रिय कार्यक्रम प्रस्तोता रहिट । पछिल्का समय उहाँ बाजुरामे रहल रेडियो बुढीनन्दा एफएममे कार्यरत रहिट । स्वर्गी पत्रकार खड्काहे अमर रख्न शाखाके अभियानहे सहयोग करलमे धनगढी उपमहानगर पालिकाके मेयर वडहे अध्यक्ष बम धन्यवाद सहित जन्मदिनके शुभकामना डेले बटै ।
