दीपेन्द्रके ४४ औं वार्षिकोत्सव
पहुरा समाचारदाता
हसुलिया, फागुन २२ । कैलारी गाउँपालिका वडा नम्बर १ हसुलियामे रहल दीपेन्द्र माविके ४४ औं वार्षिकोत्सव तथा अभिभावक भेला शुकके रोज निम्जल बा ।
गाउँपालिका अध्यक्ष लाजुराम चौधरीके बर्का पहुनामे हुइल कार्यक्रममे उहाँ गाउँपालिकाके केन्द्रमे रहल यी विद्यालयहे नमुना विद्यालयके रुपमे विकास करेपर्ना ओ ओम्ने अपने सहयोग कैना प्रतिवद्धता जनैले बटै । उहाँ शिक्षा, स्वास्थ्य, खानेपानी, यातायातके क्षेत्रमे विकास कैनाफे जनैलै ।
विशिष्ट पहुना शिक्षा शाखा प्रमुख गणेशप्रसाद मिश्र विद्यालयमे सुधार हुइटी गैल कहटी शैक्षिक, भौतिक ओ आर्थिक पक्षमे प्रअ तथा शिक्षकहुकनके लगनशिलतासे विद्यालयके सुधार हुइटी गैल बटैलै । उहाँ अइना दिनमे विद्यालयसे प्रगति कैना बाटमे अपने ढुक्क रहल जनैलै ।
विद्यालयके बजेट लेखापाल जगराम चौधरी प्रस्तुत करेले रहिट । उहाँ १ करोड ४२ लाख ९६ हजार ८०२ रुप्या २० पैसा बराबरके आयव्यय प्रस्तुत करले रहिट । विद्यालयके प्रअ विनोद भट्टराई बरस भरिक गतिविधि तथा प्रगति प्रतिवेदन प्रस्तुत करले रहिट ।
उहाँ अक्षयकोषसे ९ जाने जेहेन्दार विद्यार्थीनहे प्रतिविद्यार्थी ३/३ हजारके दरसे ओ अतिगरिब तथा अपांगता रहल विद्यार्थी पाँच जनहनहे १५/१५ सयके दरसे छात्रवृति वितरण करल जनैलै । कलेसे कक्षामे पहिल, दुसरा ओ टिसरा हुइल विद्यार्थीनहे पुरस्कार वितरण करल प्रअ भट्टराई जनैलै ।
उहे विच पूर्व प्रअ, शिक्षक, कर्मचारी लगायत १२ जनहनहे सम्मान कैगिल बा । सम्मानित हुइलमे श्याम मल्ल, नरेन्द्रबहादुर सिंह, नारायणप्रसाद चौधरी, धिरज चौधरी, चुल्हुराम चौधरी, चक्रबहादुर देउवा, रेखा जोशी, गणेशप्रसाद भाट, प्रभुराम चौधरी, कार्यलय सहयोगी चुल्हुराम चौधरी लगायत रहल बटै, ओइनहे दोसल्ला सहिट सम्मान कैगिल रहे ।
विद्यालय व्यवस्थापन समितिके अध्यक्ष वीरप्रसाद चौधरीके अध्यक्षतामे हुइल कार्यक्रममे धनाटिका युगान्त अक्षय कोषके संरक्षक तथा विशिष्ट पहुना होमबहादुर गुरुङ रहिट ।
कार्यक्रमके संचालक शिक्षक नारायणप्रसाद ढकाल, स्वागत मन्तव्य प्लस टु संयोजक प्रिमराज पन्त, विद्यार्थीसे ओरसे नेपाली भाषामे सतिश चौधरी ओ अंग्रेजी भाषा सिमरन चौधरी स्वागत मन्तव्य डेहल रहिट । कार्यक्रममे आठ ठो नृत्य प्रस्तुत कैगिल रहे । जेम्ने थारु नाँच, देउडा नाँच डेखाइल रहे । कार्यक्रममे पूर्व विद्यालय व्यवस्थापन समितिके अध्यक्ष, अभिभावक, विद्यार्थीनके उपस्थित रहे ।
