धनगढी ओ कैलारीसे खुला सरकार घोषणा
पहुरा समाचारदाता
धनगढी, २३ फागुन । कैलालीके धनगढी उपमहानगरपालिका ओ कैलारी गाउँपालिका शनिच्चरके एक कार्यक्रमके बिच आपनहे खुला सरकार घोषणा करले बाटै ।
अन्तर्राष्ट्रिय खुला तथ्यांक दिवसके अवसर पारके धनगढी उपमहानगरपालिका ओ कैलारी गाउँपालिकासे खुला सरकार घोषणा करल हुइट । धनगढी उपमहानगरपालिकाके प्रमुख नृपबहादुर वड ओ कैलारी गाउँपालिकाके अध्यक्ष लाजुराम चौधरी खुला सरकार घोषणापत्रमे हस्ताक्षर कैके नागरिक अन्तर संवाद कार्यक्रममे सार्वजनिक करल हुइट ।
घोषणापत्रके धारा १ मे खुला सरकारके अवधारणा अवलम्वन कैना बात, धारा २ मे खुला सरकारके लाग आवश्य पूर्वाधार निर्माण कैना ओ धारा ३ मे सूचना तथा आँकडा प्रवाह कैना प्रतिवद्धता व्यक्त करल बा ।
धनगढी उपमहानगरपालिकासे अपने नेतृत्व आइलठनसे नै खुला सरकारके अवधारणा अनुसारके क्रियाकलाप कैटी आइल बटैलै । ‘नागरिकहुक्रनके लाग उपमहानगरपालिकासे सक्कु चीज खुला करले बा,’ नगरप्रमुख वड कहलै– ‘खुला सरकारहे प्रवद्र्धन कैना औजारके प्रयोग करल बा ।’ धनगढी उपमहानगरपालिकाके आईएमएस धनगढी, डाटा पोर्टल, ई सिफारिस, वेइभ साईट, म्यासेजि· सिस्टम ओ सूचनाके स्वस्फूर्त प्रकाशन जैसिन चीज खुला सरकार निर्माणमे सहयोग पुगाइक लाग संचालन करल नगरप्मुख वड बटैलै । उहाँ कहलै, ‘खुला सरकार घोषणापत्र एकडम पालना कैनामे प्रतिवद्ध बाटी ।’
कैलारी गाउँपालिकाके अध्यक्ष लाजुराम चौधरी खुला सरकार निर्माणके लाग पालना करे पर्ना सक्कु सर्त पालना करल बटैलै । ‘खुला सरकारके लाग सरकार नागरिक सहभागिता, पारदर्शिता ओ उत्तरदायी हुइ परल उ चीजमे हम्रे प्रतिवद्ध बाटी,’ अध्यक्ष चौधरी कहलै । उहाँ कुछ समयपाछे गाउँपालिकाके सक्कु वडामे सूचना केन्द्रके स्थापना फेन कैना बटैलै । ओकर लाग गाउँपालिकासे आवश्यक काम फेन आघे बह्राइल उहाँ बटैलै ।
अन्तर्राष्ट्रिय तथ्यांक दिवसके अवसरमे सुशासन परियोजना अन्तर्गत धनगढी उपमहानगरपालिका ओ ग्राम विकास तथा अनुसन्धान केन्द्रसे कैलाली जनपुस्तकालयमे सामुदायिक सूचना केन्द्रके स्थापना करले बावै । सामुदायिक सूचना केन्द्रके नगरप्रमुख वड ओ गाउँपालिका अध्यक्ष लाजुराम चौधरी संयुक्त रुपमे उद्घाटन करल रहिट । उहे अवसरमे नागरिक अन्तर संवाद फेन संचालन करल रहे ।
