आजसे डुसरा चरणके कोरोना खोप
धनगढी, २३ फागुन । कोरोना विरुद्धके डुसरा चरणके खोप अभियान आज (फागुन २३) गतेसे सञ्चालन हुइना हुइल बा ।
डुसरा चरणके खोप अभियान अन्तर्गत कैलालीके धनगढी उपमहानगरपालिका, गौरीगंगा, लम्कीचुहा ओ टीकापुर नगरपालिकाके ५५ बरससे उप्पर उमेर समूहके १ लाख ८ हजार ३३८ जहनहे खोप लगाजैना स्वास्थ्य कार्यालय कैलालीके कार्यालय प्रमुख लालबहादुर धामी जानकारी डेलै ।
उ अभियान अन्तर्गत सक्कु तयारी हुइल जनाइल बा । ‘अभियान अन्तर्गत सक्कु तयारी पुरा हुइल बा,’ प्रमुख धामी कहलै– ‘ओकर लाग १३ स्थानीय तहके स्वास्थ्य संयोजक ओ ९० ठो खोप केन्द्रके स्वास्थ्य संस्था प्रमुखहे अभिमुखीकरण करसेकल बा ।’
ओस्टके खोप केन्द्र सञ्चालन करेबर चाहना सक्कु सामग्री खोप केन्द्र ओ पालिकामे पुगासेकल जनाइल बा । ओस्टके खोप लगुइया २ सय स्वास्थ्यकर्मीहुक्रनहे अभिमुखीकरणके साथे पालिका ओ वडा स्तरमे फेन अभिमुखीकरण करसेकल जनाइल बा ।
खोप अभियानके लाग जिल्ला भर ९० ठो खोप केन्द्र तोकल बा । मने २३ गतेसे सञ्चालन हुइना अभियानमे धनगढी उपमहानगरपालिकाके ११, गौरीगंगासे ११, लम्की चुहा ४ ओ टीकापुर नगरपालिकाके ७ ठो खोप केन्द्रसे खोप लगैना जनाइल बा ।
कैलालीमे कम्तीमे १ लाख २० हजार डोज आवश्यक रलेसे फेन हालके लाग ४७ हजार खोप किल प्राप्त हुइल प्रमुख धामी बटैलै ।
अभियानमे सहभागि हुउइया ५५ बरस उप्पर उमेर समूहके धनगढी उपमहानगरपालिकाके ४५ हजार ७९१ जाने, टीकापुरमे २३ हजार ४९६, गौरीगंगामे १६ हजार ५४० ओ लम्कीचुहा नगरपालिकामे २२ हजार ५११ जाने रहल जनाइल बा ।
