‘नारी दिवस औपचारिकतामे सीमित’
पहुरा समाचारदाता
धनगढी, २५ फागुन । सुदूरपश्चिम प्रदेशका मुख्यमन्त्री त्रिलोचन भट्ट नारी दिवस औपचारिकतामे सीमित हुइ लागल बटैले बाटै ।
१११ औँ अन्तर्राष्ट्रिय श्रमिक महिला दिवसके अवसरमे धनगढीमे आयोजित कार्यक्रममे मुख्यमन्त्री भट्ट दिवसहे औपचारिकतामे सीमित नैपर्ना बटाइल हुइट । ‘दिवस औपचारिकतामे सीमित हुइ लागल बावै,’ मुख्यमन्त्री भट्ट कहलै, ‘समग्र रूपमे महिलाहे अधिकार डेना आवश्यक बा ।’
प्राप्त अधिकारके रक्षा कैना अब्बेक सबसे बरवार चुनौती रहल मुख्यमन्त्री भट्ट बटैलै । सुदूरपश्चिम प्रदेशके सभामुख अर्जुनबहादुर थापा महिला फेन जिम्मेवारी कुशलता पूर्वक निर्वाह करे सेक्ना बटैलै ।
सभामुख थापा कानुन निर्माण हुइलेसे फेन कार्यान्वयन पक्ष फितलो रहल अरोप लगैलै । महिलाहे रोजगारीमे जोर्ना आवश्यक रहल सभामुख थापाके कहाइ रहे ।
सामाजिक विकास मन्त्री कृष्णराज सुवेदी सुदूरपश्चिम प्रदेशमे लम्मा समयसे महिला नेतृत्वमे रहल बटाइल रहिट । मन्त्री सुबेदी महिला अधिकारके लाग प्रदेश सरकार लागल बटैलै ।
सामाजिक विकास मन्त्रालयसे आयोजना करल कार्यक्रममे टमान झाँकी समेत प्रस्तुत करल रहे ।
नारी दिवसके अवसरमे मुख्यमन्त्रीसे शुभकामना सुदूरपश्चिम प्रदेशके मुख्यमन्त्री त्रिलोचन भट्ट १११ औँ अन्तर्राष्ट्रिय नारी दिवसके अवसरमे देश, विदेश तथा प्रदेशमे रहल सक्कु नारीहुक्रनहे शुभकामना डेले बाटै ।
सोम्मारके एक शुभकामना सन्देश जारी कैटी मुख्यमन्त्री भट्ट नेपालके संविधानसे लैंगिक भेदभाव बिना राज्यके हरेक निकायमे समानुपातिक समावेशी सिद्धान्तके आधारमे सहभागी हुइना हक सुनिश्चित करल उल्लेख करलै । अन्तर्राष्ट्रिय नारी दिवस ८ मार्चके रोज विश्वभर ‘महिलाके सुरक्षा, सम्मान ओ रोजगार, समृद्ध नेपालके आधार’ कना नारासहित टमान कार्यक्रम कैके मनाजैटी रहल बा ।
