रेडक्रस ५० औं स्वर्ण जयन्ती मनैना

पहुरा समाचारदाता
धनगढी, २५ फागुन । नेपाल रेडक्रस सोसाइटी धनगढी ५० औं स्वर्ण जयन्ती मनैना हुइल बा ।

शाखाके स्थापना दिवसके अवसरमे इहे फागुन २६ गते स्वर्ण जयन्ती समारोह मनैना सोम्मारके पत्रकार सम्मेलनके आयोजना कैटी जानकारी कराइल हो । नेपाल रेडक्रस सोसाइटी धनगढीके मन्त्री लोकराज जोशी ५० औं स्वर्ण जयन्तीके अवसरमे रेडक्रसके जन्मदाता जँ हेनरी ड्युनाके अद्र्धकदके शालिकके अनावरण समेत कैना बटैलै । ओस्टके उहे दिन प्रभात फेरी, सम्मानके कार्यक्रम समेत रहल जानकारी डेलै ।

नेपाल रेडक्रस सोसाइटी स्थापनाकाल २०२० से नै टमान मानवीय सेवामूलक कार्य सञ्चालन कैटी आइल बा । नेपाल रेडक्रसके स्थापना हुइल करिब ७ बरसपाछे कैलाली जिल्लामे २०२७ साल फागुन २६ गते उ शाखाके स्थापना हुइल हो ।

उ शाखासे फेन स्थापनाकालसे नै समुदायके संकटासन्नता न्यूनीकरण कार्यमे अग्रणी भूमिका निर्वाह कैटी आइल मन्त्री जोशी बटैलै । ५० औं स्वर्ण जयन्ती समारोहमे सुदूरपश्चिम प्रदेशके मुख्यमन्त्री, सरकारके मन्त्री, प्रदेश सांसद लगायतके उपस्थिति रहना नेपाल रेडक्रस सोसाइटी धनगढी जनैले बा ।