सात विधाके मनोनयन सार्वजनिक
पहुरा समाचारदाता
धनगढी, २७ फागुन । धनगढीमे हुइना दोसरे कैलाली अस्पताल सुदूरपश्चिम स्पोर्टस अवार्डके सात विधाके मनोनयन सार्वजनिक करल बा ।
वर्ष २०७६ मे वर्षभरके प्रदर्शनके आधारमे अवार्ड आयोजक नेपाल खेलकुद पत्रकार मञ्च कैलालीसे अवार्ड डेना ९ विधामध्ये सात विधाके मनोनयन सार्वजनिक करल हो ।
यीआघे दुई चो पत्रकार सम्मेलन करके चार विधाके मनोनयन सार्वजनिक करलमे बिफेक रोज ठप तीन विधाके मनोनयन सार्वजनिक करले बा ।
धनगढीमे पत्रकार सम्मेलन करके नवजीवन हस्पिटल वर्ष पुरुष खेलाडी, नोभा हस्पिटल वर्ष महिला खेलाडी ओ दिनेश सोप वर्ष प्रशिक्षक विधाके मनोनयन सार्वजनिक करल हो ।
कैलाली हस्पिटल दोसर सुदूरपश्चिम स्पोर्टस अवार्डके वर्ष पुरुष विधा प्रायोजक नवजीवन हस्पिटलके सञ्चालक योगेन्द्र ओझा, नोभा हस्पिटलके प्रशासकीय अधिकृत सुमन भट्ट ओ दिनेश सोपके ब्रान्ड निर्देशक आदित्य हमाले मनोनयन सार्वजनिक करलैं ।
नवजीवन हस्पिटल वर्ष पुरुष खेलाडीके मनोनयनमे एथलेटिक्सका गोपीचन्द्र पार्की, दुवाथोलनके हिमाल टमट्टा ओ तेक्वान्दोके वीरबहादुर महरा परल बाटैं । तीनु जाने १३ औं दक्षिण एसियाली खेलकुदमे स्वर्ण पदक जिटले रहिट ।
नोभा हस्पिटल वर्ष महिला खेलाडीके मनोनयनमे पौडीके गौरिका सिंह, तेक्वान्दोके आयशा शाक्य ओ कुस्तीके संगिता धामी परल बाटी । १३ औं दक्षिण एसियाली खेलकुदमे गौरिका चार स्वर्ण सहित ९ पदक जिटेले रहिट कलेसे आयशा तेक्वान्दोमे दोहोरो स्वर्ण जिट्ले रहि । संगिता सागके ईतिहासमे पहिलचो कुस्तीमे स्वर्ण जिट्ले रहि ।
अस्टेक, दिनेश सोप वर्ष प्रशिक्षकके मनोनयनमे भलिबलके जगदीश भट्ट, कुस्तीके राजेन्द्र चन्द ओ कबड्डीके तारासिंह भाट परल बाटैं । जगदिश १३ औं दक्षिण एसियाली खेलकुदमे महिला भलिबलमे रजत पदक जिटैले रहैं कलेसे सेन्ट्रल जोन भलिबलमे स्वर्ण जिटैले रहिैं । राजेन्द्र १३ औं दक्षिण एसियाली खेलकुदके ईतिहासमे पहिलचो कुस्तीमे स्वर्ण पदक सहित ७ पदक जिटल रहिट । ओ, तारासिंह भाट फेन सागमे महिला कबड्डीमे नेपालहे ऐतिहासिक रजत पदक जिटैले रहिट । ईन्डो नेपाल आमन्त्रण कबड्डी प्रतियोगितामे पुरुष टीमहे रजत जिटैले रहिट ।
यीआघे माया मेट्रो हस्पिटल सुदूरपश्चिम आईकन पुरुष ओ तिवारी मेडिसिन डिष्ट्रिव्युर्टस सुदूरपश्चिम आईकन महिला तथा निसर्ग हस्पिटल वर्ष युवा खेलाडी विधाके मनोनयन सार्वजनिक करल रहे ।
निसर्ग हस्पिटल वर्षके युवा खेलाडीके मनोनयनमे कुस्तीके संगीता धामी, फुटबलके अर्पण कार्की ओ भलिबलके पुनम चन्द परल बाटी । संगिता १३ औं दक्षिण एसियाली खेलकुदमे स्वर्ण पदक जिटैले रहि । अर्पण कार्की सागमे नेपाल स्वर्ण जिटल टोलीके सदस्य रहिट । पुनम सागमे रजत तथा सेन्ट्रल जोन भलिबलमे स्वर्ण जिटल टोलीके सदस्य रहि ।
माया मेट्रो हस्पिटल सुदूरपश्चिम आइकन पुरुष विधामे ब्याटमिन्टनके प्रिन्स दाहाल, क्रिकेटका शेर मल्ल ओ क्रिकेटके सुवाश ऐर मनोनयनमे परल बाटैं ।
तिवारी मेडिसिन डिष्टिव्युर्टस सुदूरपश्चिम आइकन महिला विधामे कबड्डीके जयन्ती बडु, खो–खो के पूजा ओड ओ कुस्तीके सिंवांगी दुवे मनोनयनमे परल बाटैं । बिवाईसी पिपुल च्वाईस अवार्डमे पौडीके गौरिका सिंह, क्रिकेटके अन्जली चन्द ओ भलिबलके सरस्वती चौधरी मनोनयनमे परल बाटी ।
सात विधाके मनोनयन सार्वजनिक हुइलेसे फेन दुई विधाके घोषणा भर अवार्ड कार्यक्रममे हुइना अवार्डके संयोजक प्रदीप पाठक जानकारी डेलैं । उहाँक अन्सार न्यू सिटी पोलीक्लिनिक स्पेशल अवार्ड ओ सारथी अस्पताल लाईफटाईम एचिभमेन्ट अवाडके घोषणा चैत ६ गते कार्यक्रममे करजाइ ।
धनगढीमे हुइना दोसर सुदूरपश्चिम स्पोर्टस अवार्डके मुख्य प्रायोजक धनगढीके कैलाली अस्पताल रहल बा । सुदूर फुड ईन्डष्ट्रिज, ब्राईटवे पब्लिक स्कुल, मेरो रेडिमेड उद्योग ओ घोडाघोडी हस्पिटल सह–प्रायोजक रहल अवार्डमे वर्ष पुरुष खेलाडीहे नवजीवन अस्पताल, वर्ष महिला खेलाडीहे नोभा अस्पताल, पिपुल च्वाईस अवार्डहे वनदेवी युवा क्लब ओ वर्ष युवा खेलाडीहे निसर्ग अस्पताल प्रायोजन करले बा ।
अस्टेक, स्पेशल अवार्डहे न्यू सिटी पोलीक्लिनिक, लाईफटाईम एचिभमेन्ट अवार्डहे सारथी अस्पताल, सुदूरपश्चिम आईकन पुरुषहे माया मेट्रो अस्पताल ओ महिलाहे तिवारी मेडिसिन प्रायोजन करले बा ।
अवार्डके प्रवद्र्धकमे धनगढी उपमहानगरपालिका ओ सुदूरपश्चिम सरकारके सामाजिक विकास मन्त्रालय रहल बा । नवजीवन सहकारी संस्था लिमिटेड को–अपरेटिभ्स पार्टनर ओ ओसन पब्लिकेसन एजुकेसन पार्टनरके रुपमे रहल बा । धनगढी बसपार्कमे रहल मिश्रा जनरल स्टोर ओ एलएनचोकमे रहल शम्भु पुस्तक भण्डार फेन अवार्डहे सहयोग करले बा ।
अवार्डमे वर्ष २०७६ मे करल प्रदर्शनके आधारमे उत्कृष्ट पुरुष खेलाडी, उत्कृष्ट महिला खेलाडी, उत्कृष्ट युवा खेलाडी, उत्कृष्ट प्रशिक्षक, उत्कृष्ट पारा खेलाडी ओ वर्षके उत्कृष्ट टिम तथा खेलकुदमे पुगाइल विशेष योगदानके कदर स्वरुप स्पेसल अवार्ड, पूरा जीवन खेलकुदमे समर्पित करना एक पाका खेलकर्मीहे लाइफटाइम अचिभमेन्ट अवार्ड, समर्थकके मतके आधारमे डेना पिपल्स च्वाईस अवार्ड करके ९ विधामे खेलाडी तथा खेलकर्मीहे पुरस्कृत करजाइ ।
अवार्डके उत्कृष्ट खेलाडी पुरुष ओ महिला, उत्कृष्ट प्रशिक्षक ओ पिपल्स च्वाइस अवार्ड करके ४ विधाके विजेताहे नगद ३० हजार सहित ट्रफी मेडल ओ प्रमाणपत्र, वर्ष युवा खेलाडी, स्पेसल अवार्ड, लाईफ टाईम एचिभमेन्ट अवार्डके विजेताहुकनहे नगद २५ हजार सहित ट्रफी मेडल ओ प्रमाणपत्र डेजाइ ।
अस्टेक सुदूरपश्चिम आइकन महिला ओ पुरुष विधाके विजेताहे नगद २० हजार सहित ट्रफी मेडल ओ प्रमाणपत्रके साथे टमान विधाके विजेताहे गिफ्ट ह्याम्पर प्रदान करना आयोजक जनैले बा ।
अवार्ड कार्यक्रम डिसहोम एक्सन स्पोर्टस ओ धनगढीके स्थानीय संचार माध्यमसे प्रत्यक्ष प्रसारण करना बटागिल बा । कार्यक्रम धनगढीके ओम प्यालेसमे आयोजना हुइ ।
