उपभोक्ता सचेत हुई पर्ना जोड

पहुरा समाचारदाता
धनगढी, ३ चैत । विश्व उपभोक्ता अधिकार दिवसके अवसरमे धनगढीमे टमान कार्यक्रम करके मनागिल बा । सोम्मारके रोज वाणिज्य आपूर्ति तथा उपभोक्ता संरक्षण कार्यालय धनगढी ओ धनगढी उपमहानगरपालिकाके संयुक्त आयोजनामे उपभोक्ता अधिकारसम्बन्धी अन्तरक्रिया कार्यक्रम करले बा ।

राष्ट्रिय उपभोक्ता मञ्च ओ उपभोक्ता हकहित संरक्षण मञ्च धनगढीके सहकार्यमे हुइल कार्यक्रममे उपभोक्ताके अधिकार, उपभोक्ता अधिकारके आधारभूत सिद्धान्त, नेपालमे उपभोक्ताके अवस्था, उपभोक्ता अधिकार संरक्षणके अन्तर्राष्ट्रिय कानूनसे सिर्जना हुइल दायित्व, बजार व्यवस्थापनसम्बन्धी संघीय कानून, वस्तु वा सेवा बजारमे उपभोक्ताके सरोकार लगायतके विषयमे छलफल हुइल रहे ।

कार्यक्रमके उद्घाटन धनगढी उपमहानगरपालिकाके नगरप्रमुख नृपबहादुर वड करले रहिट । कार्यक्रमके उद्घाटन करटी नगरप्रमुख वड सक्कु क्षेत्रके पक्षसे जिम्मेवारी वहन करे सेक्लेसे खाद्य अधिकार सुनिश्चित हुइ सेक्ना बटैलैं । ‘खाद्य अधिकार सुनिश्चितताके लाग सरोकारवाला निकायसे प्रभावकारी अनुगमन करेपल,’ उहाँ कलैं, ‘हम्रे उपभोक्ताहुक्रे वस्तु वा सेवाके बिल लेना सुरु करलेसे फेन ढेर सुधार आइ सेकी ।’

कार्यक्रममे वाणिज्य, आपूर्ति तथा उपभोक्ता संरक्षण कार्यालय धनगढीके कार्यालय प्रमुख कमलबहादुर पुनमगर उपभोक्ता अधिकारबारे कार्यपत्र प्रस्तुत करले रहिट । कार्यपत्र प्रस्तुत करटी उहाँ स्वास्थ्य रक्षा करेक लाग उपभोग्य वस्तु वा सेवा खरिद करेबेर परिमाण, गुणस्तर ओ उचित मूल्यलगायतमे ध्यान डेहे परना बटैलैं । उहाँ प्याकिङमे उत्पादनकर्ताके नाम, ठेगाना, अधिकतम खुद्रा मूल्य, उत्पादन करेबेर प्रयोग हुइल कच्चा पदार्थ, तौल, भण्डारण ओ उपभोग करना तरिका उल्लेख करल बा कि नैहो कहिके हेरे परना बटैलैं । ‘बजार उपभोक्ताहे सम्मान करेपरठ,’ उहाँ कलैं, ‘अखाद्य वा कमसल वस्तु वा सेवाके प्रयोगसे हानी नोक्सानी हुइलेसे क्षति पूर्तिके लाग तोकल उपभोक्ता अदातल समक्ष उजुरी करी ।’ उहाँ उपभोक्ता सचेत हुइना फेन जरुरी रहल बटैलैं ।

‘उपभोग मिति नाघल कौनो फेन औषधि, खाद्य तथा अन्य वस्तु खरिद नैकरी,’ कार्यालय प्रमुख पुनमगर कलैं, औषधि वा औषधिजन्य पदार्थ रलेसे ओरक प्याकिङमे उपभोग्य मिति ओ प्रयोग करना तरिका उल्लेख हुइक परठ ।’ उहाँ सामान खरिद करेबेर बिल पैना उपभोक्ताके अधिकार हो कलेसे बिल डेना विक्रेताके कर्तव्य रहल ओरसे वस्तु तथा सेवा खरिद विक्री करकेबेर अनिवार्यरुपमे बिल लेनाडेना करना आग्रह करलैं । अस्टेक, उपभोक्ता हित विपरित कौनो कार्य हुइलेसे नागरिक खबरदारीके लाग वाणिज्य आपूर्ति तथा उपभोक्ता संरक्षण कार्यालयमे जानकारी फेन कराइक कलैं । उहाँ विक्रेताहुक्रे ध्यान डेहेपरना बाट, स्वच्छ बजारके विशेषता, बजारके विकृत प्रवृति, उपभोक्ता अधिकार संरक्षणके बाधाके विषयमे जानकारी करैले रहिट ।

अस्टेक कार्यक्रममे खाद्य प्रविधि तथा गुण नियन्त्रण कार्यालयके खाद्य अनुसन्धान अधिकृत उज्वल कोइराला खाद्य स्वच्छता तथा मानव सुरक्षासम्बन्धी कार्यपत्र पस्तुत करले रहैं । कार्यपत्र पस्तुत करना क्रममे उहाँ कौनो फेन खाद्य पदार्थ उपभोग करलेसे स्वास्थ्यमे तुरुन्ट वा दीर्घकालीन असर नैपरेपरना बटैलैं । उहाँ खाद्य वस्तुमे रंग मिलैना, ढुसीजन्य खाद्य पदार्थके प्रयोगके मानव स्वास्थ्यमे नैमजा असर कना बटैलैं ।

कार्यक्रममे उपभोक्ता हकहित संरक्षण मञ्च धनगढीके उपाध्यक्ष धनपति ढुंगेल उपभोक्ता हकहितके बारेमे कार्यपत्र प्रस्तुत करले रहिट । उहाँ उपभोक्ताहुकनके खाद्य हितके लाग सरोकारवाला निकायसे प्रभावकारी रुपमे बजार अनुगमन, व्यवस्थापन र नियमन करेपरनामे जोड डेले रहैं । उहाँ कलैं, ‘जिम्मेवारी पाइल निकायके अधिकारीसे प्रभावकारी रुपमे जिम्मेवारी बहन करेलेसे उपभोक्ताके खाद्य अधिकार सुनिश्चित हुइ ।’

अस्टेके कार्यक्रममे सहायक प्रमुख जिल्ला अधिकारी हिरालाल चौधरी उपभोक्ता ओ व्यवसायी समन्वय, सहकार्य करके आगे परना बटैलैं । उहाँ खाद्य अधिकार सुनिश्चितताके लाग उपभोक्ता सजक ओ व्यवसायी इमान्दार हुइपरना बटैलैं । कार्यक्रममे कैलाली उद्योग वाणिज्य संघ कैलालीके महासचिव ओम विष्ट व्यक्ति विशेषके कमिकमजोरीके कारण सक्कु व्यवसायी बदनाम हुइपर बटैलैं । उहाँ विदेशी उत्पादनसे बरु स्वदेशी उत्पादन प्रयोग करेपरनामे जोड डेले रहैं ।

कार्यक्रममे जिल्ला प्रहरी कार्यालयके प्रमुख अनुपम समशेर जवरा, उद्योग पर्यटन वन तथा वातावरण मन्त्रालयके उपसचिव रामविचारी ठाकुर, धनगढी उपमहानगरपालिकाके हरिबहादुर चन्द, नेपाल पत्रकार महासंघ कैलालीके शाखा अध्यक्ष जगत साउँद, पञ्चोदय माविके बाल क्लव अध्यक्ष लक्ष्मी जोशी लगायत अपन मन्तव्य व्यक्त करले रहैं । कार्यक्रम धनगढी उपमहानगरपालिकाके उपप्रमुख सुशीला मिश्र भट्टके अध्यक्षतामे हुइल रहे कलेसे कार्यक्रममे सञ्चालन पत्रकार भोजराज जोशी करले रहिट ।