किसानहे कृषि ज्ञान सिखैटी सहकारी
पहुरा समाचारदाता
भजनी, ४ चैत । कैलालीके किसान बहुउद्देश्यीय सहकारी संस्था तीन क्षेत्रमे काम कैटी आइल बा । पहिल बैंकिङ सेवा, डुसरा लघुबित्त ओ टिसरा कृषि क्षेत्र । २०७६ साल जेठ ६ गतेसे जानकी गाउँपालिका–९ के अमरावतीमे सहकारीसे कृषिके व्यावसायिक शुरुआत करल रहे ।
कोरोना महामारीके कारण बरवार नोक्सानी व्यहोरल रलेसे फेन उ सहकारी संस्थासे अब्बे पुनः मजा हुइटी गैल कृषि प्राविधिक वीरेन्द्र शाह बटैलै । उहाँ बन्दाबन्दीके समयमे उत्पादन सोचलसे मजा रहल मने बजारीकरणके समस्याके कारण लाखौँ नोक्सान हुइल बटैलै । ‘हम्रे व्यावसायिक कृषिसंगे इहीहे तालीम केन्द्रके रुपमे फेन विकास करले बाटी । यहाँ सिक्ना ओ सिकैना ढिउर हुइठ्,’ उहाँ कहलै– ‘काल्हके दिनमे औरे जनहनसे किनके खउइयाहुक्रे आज आपनहे हुइलेसे फेन कृषिमे प्रेरित हुइल बाटै । विशेषकैके, हमार क्षेत्र आँजरपाँजरके मजा ज्ञान लेहल हम्रहीनहे महसुस ुहुइल बा ।’
सहकारीके मुख्य उद्देश्य फेन कृषि क्षेत्रहे उप्पर उठैना नै रहल सहकारीके महाप्रबन्धक डम्बरबहादुर शाह बटैलै । किसानके समूहसे स्थापना हुइल सहकारी कैलालीके १३ स्थानीय तहमे व्यावसायिक कृषि फार्म सञ्चालनमे लन्ना तयारी करल उहाँके कहाइ बा । ‘हमार उद्देश्य किसानहे व्यावसायिक कृषिमे लगैना फेन हो । उहे अनुसार कैलालीके १३ स्थानीय तहमे कृषि फार्म सञ्चालनके लाग तयारी हुइटी रहल बा ।’ उहाँ कहलै– ‘उ फार्महे तालीम केन्द्रके रुपमे विकास कैके समूहमे आबद्ध किसानहे आत्मनिर्भर बनैनामे मद्दत पुग्ना बा ।’ महाप्रबन्धक शाह कृषि फार्मके लाग कहलजस्टे जग्गा उपलब्ध हुइ नैसेकल बटैटी लिजमे होए वा किनके रलेसे फेन सहकारीके सदस्यहुक्रनके जीवनस्तर उप्पर उठाइक लाग सहकारीसे सहयोग कैना बटैलै ।
गत आर्थिक बरसमे रानी जमरा कुलरिया सिँचाइ आयोजना कृषि कार्यक्रम कार्यान्वयन इकाइसे कृषि फार्महे दुईठो टनेल निर्माणके लाग ७५ प्रतिशत अनुदानमे सहयोग करलसंगे अब्बे बिहीन उत्पादनके कामहे फेन सहकारी आघे सरले बा । बिहीन बिक्रीसे फेन मजा आम्दानी हुइल बटैटी कृषि प्राविधिक शाह अब्बे फुलगोभी, काँक्रा, लहरे बाली, भिण्डी लगायत टिनाटावन बजारमे पुगल बटैलै । चारजाने कर्मचारी कृषि फार्ममे प्रत्यक्ष रोजगारी पैले बाटै कलेसे अन्य ढिउर जाने ज्यालादारीमे काम पैले बाटै ।
‘ज्यालामे काम कैना फेन सहकारीमे आबद्ध सदस्यहे प्राथमिकतामे राखल बा । काम फेन करठै । ओहैसे सिक्लेसे फेन हुइठ्,’ महाप्रबन्धक शाह कहलै– ‘कृषि प्राविधिकसंगे काम करेबर सदस्यहुक्रे फार्ममे सिकल सीपहे आपन बारीमे लगैठै । अनि आत्मनिर्भरके लाग समस्या नैरहठ् ।’ दुई बिघा १० कट्ठा क्षेत्रफलमे शुरु करल कृषि फार्मके लाग जग्गा कम हुइ लागल बटैटी उहाँ आभिन १० बिघा जमीन उहे ठाउँमे खोजी करटी रहल बटैलै । ‘हम्रे परीक्षणके रुपमे कृषि फार्म शुरु करल रही । जिहीसे सोचलसे मजा नतिजा डेहल,’ महाप्रबन्धक शाह कहलै– ‘अब्बे सुखड, बौनियाँ, अत्तरिया धनगढी ओर फेन विस्तार कैना योजना बा ।’
विशेष कैके सहकारी संस्थासे किसानहे कृषि पेशामे आकर्षण बह्रैना उद्देश्यके साथ फार्म विस्तारके काम शुरु करल कृषि प्राविधिक शाहके कहाइ बा । ओहकान अनुसार गत बरससे इ बरसके आम्दानी ढिउर हुइल बा कलेसे ओकर बजारीकरणमे फेन कौनो समस्या डेखल नैहो ।
