गर्ल्स ट्रान्जिसन फण्ड (जीटीएफ) हस्तान्तरण

पहुरा समाचारदाता
धनगढी, ९ चैत । युकेएडके आर्थिक सहयोगमे मर्सिकोर नेपाल ओ बेस कैलालीसे सञ्चालित ‘सीमान्तकृत बालिकाहरुको शिक्षामा सहयोग (स्टेम)’ परियोजनासे २०६६ साल यहोर आर्थिक कारण विद्यालय छोरल बालिकाहुकनके व्यवसायके लाग संचालन कैगिल घुम्टी कोष गर्ल्स ट्रान्जिसन फण्ड (जीटीएफ) हस्तान्तरण कैगिल बा ।

विक्रम संवत् २०७१ सालसे मर्सीकोरसे सञ्चालन रहल उ कार्यक्रम धनगढी उपमहानगरपालिकाके रोहवरमे गल्र्स ट्रान्जिसन फण्ड सहकारीहे हस्तान्तरण करल हो । अँट्वारके रोज धनगढीमे साझेदारी संस्थासे सुदूरपश्चिमाञ्चल बहुउद्देश्यीय सहकारी संस्था लिमिटेडहे गल्र्स ट्रान्जिसन फण्ड (जीटीएफ) हस्तान्तरण करले बा । यी कार्यक्रम शिक्षामे पहुँच नैपुगल सीमान्तकृत किशोरी तथा महिलाहे सहयोगके उद्देश्यसे सञ्चालित बा ।

धनगढी उपमहानगरपालिकाके उपप्रमुख सुशीला मिश्र भट्ट एक कार्यक्रमके बीच उद्घाटन करले रही । कार्यक्रममे उपप्रमुख मिश्र शिक्षामे पहुँच नैरहल किशोरी तथा महिलाहे न्यून ब्याजदरमे ऋण डेहे उहाँ हुकनहे उद्यमी बन्नमे सहयोग करना बटैली । उहाँ यी कार्यक्रम सुनिश्चितता ओ दिगोपनके लाग शुभकामना व्यक्त करली ।

कार्यक्रममे मर्सिकोर नेपालके प्रतिनिधि हेमराज भट्ट यी कार्यक्रमसे शिक्षासे वञ्चित स्थानीय तहमे रहल १६ वर्षसे ३६ वर्षके किशोरी ओ महिलाहुकनहे सहुलियतदरमे ऋण डेके उद्यमी बनाइल जानकारी डेलैं । उहाँ यी कार्यक्रम युवा स्वरोजगार कार्यक्रमहे प्रवद्र्धन करना उद्देश्यसे यी कार्यक्रम लागू करल बटैलैं ।

धनगढी उपमहानगरपालिका, घोडाघोडी नगरपालिका, टीकापुर नगरपालिका ओ कैलारी गाउँपालिकाके सहकारी मार्फत लागू हुइल यी कार्यक्रममे १ सय ७८ जहनहे सहुलियतमे ऋण डेहल संस्था जनैले बा ।

सहकारीके अध्यक्ष भोजराज जोशीके अध्यक्षतामे हुइल कार्यक्रममे स्वागत संस्थाके सचिव प्रकाश जोशी करले रहैं । कार्यक्रमके सञ्चालन संस्थाके व्यवस्थापक रूपा जोशी करले रहि ।

जिहीहे गल्र्स ट्रान्जिसन फन्ड कहिके जानजाइठ ओ कैलालीके चार ठो सहकारीसे ३ करोड २० लाख रुप्या छुटयाइल बा । जौन रुप्या सीमान्तकृत बालिकाहुकनके व्यावसाय तथा शिक्षाके लाग प्रयोग करे सेक्ना कहल बा ।

उ रुप्या सीमान्तकृत बालिका ८ प्रतिशत व्याजरमे विना धितो व्यावसयिक लोन डेके व्यावसाय करिट कहिके छुटयाइल बेस कैलालीके जिल्ला कार्यक्रम संयोजक लक्ष्मण चौधरी बटैठै । गल्र्स ट्रान्जिसन फन्ड मार्फत चार सहकारीसे व्यावसायिक लोन लेके अब्बेसम ३५० बालिका व्यवसाय करटी रहल उहाँ जनैलै ।