छात्राओर एरिष्टो फाइनलमे, छात्रओर हिल वर्ड ओ शारदा सेमीफाइनलमे प्रवेश
पहुरा समाचारदाता
धनगढी, ९ चैत । धनगढीमे जारी मेयर उपमेयर छात्र, छात्रा क्रिकेट प्रतियोगिता अन्तरगत छात्राओर एरिष्टो इङलिस स्कुल फाइनल प्रवेश करले बा । ओस्टेक करके छात्रओर हिलवर्ड स्कुल ओ शारदा विद्या निकेत सेमीफाइनल प्रवेश करले बटै ।
सोम्मार सम्पन्न छात्राओरके सेमीफाइनल खेलमे शैलेश्वरी बोर्डिङ स्कुलहे ४० रनसे पराजित करटी एरिष्टो इङलिस स्कुल फाइलनमे स्थान सुरक्षित बनाइल हो ।
टस हारके ब्याटिङ करल एरिष्टो निर्धारित २० ओभरमे ४ विकेट गुमैटी १ सय १६ रन बनाइल । एरिष्टोके लाग ब्याटिङ करल कप्तान कुस्मा खाती ओ आस्मा सिंह अविजित रहटी २७/२७ रन बनैली । बलिङओर शैलेश्वरीके रितु अवस्थी, सिन्धु थापा तथा कप्तान राधिका कुमारी धामी समान १/१ विकेट लेली ।
१ सय १७ रनके लक्ष्य पछयाइल शैलेश्वरीसे २० ओभरमे ६ विकेट गुमैटी ७६ रन केल बनाई सेकल । ओकर लाग कप्तान राधिका कुमारी धामी १४, रितु अवस्थीसे १३, तथा गौरी विक ओ सरस्वती धामी अविजित ११/११ रन बनैली ।
बलिङओर एरिष्टोके हिशिला खड्का ओ करिस्मा खड्कासे समान २/२ विकेट लेली । उ खेलके ओम्यान अफद म्याच एरिष्टोके करिस्मा खड्का हुइली ।
प्रतियोगिता अन्तरगत मंगरके छात्राओर अपि विद्या निकेतन ओ वेष्टर्न क्रिष्टल एकेडेमी विच दुसरा सेमीफाइनल खेल हुई । मंगर विजेता हुइना छात्राओरके टोली एरिष्टो स्कुलसंग ट्रफिके लाग प्रतिष्पर्धा करी ।
सोम्मार छात्रओर दुई ठो क्वाटर फाइलन चरणके खेल सम्पन्न हुइल बटै । पहिल क्वाटर फाइलन खेलमे शारदा माविहे ३ विकेटसे पराजित करटी हिल वर्ड स्कुल सेमीफाइनल प्रवेश करले बा ।
टस हारके पहिल ब्याटिङ करल शारदा मावि निर्धारित १५ ओभर मन्से १३ ओभर २ बलमे सक्कु विकेट गुमैटी ८९ रनमे समेटल रहे । शारदाके कुम्भ देउवा ३५ बनैना बाहेक और खेलाडी दोहोरो अंक जोरे नइसेक्लै ।
शारदाहे सस्तामे समेट्न क्रममे हिल वर्डके सञ्जय कठायत ओ विराज गज्मेर समान २÷२ विकेट लेलै । शारदासे डेहल ९० रनके लक्ष्य पछयाइल हिलवर्ड १२ ओभर ३ बलमे ९३ रन बनैटी जित निकारल हो । हिलवर्डहे जित डेहुवइना क्रममे कप्तान रमेश विष्ट अविजित रहटी ३६ रन बनैटी । बलिङओर शारदाके कुम्भ देउवा ओ रविन्द्र रोक्का समान २/२ विकेट लैगिलै ।
मंगर सम्पन्न छात्रओरके दुसरा क्वाटर फाइलन खेलमे ब्रोड भिजन स्कुलहे ४५ रनसे पराजित करटी शारदा विद्या निकेतन सेमीफाइलन प्रवेश करले बा ।
टस जिटके व्याटिङ करल शारदासे निर्धारित १५ ओभरमे ६ विकेट गुमैटी १ सय ३५ रन बनाइल रहे । ओकर लाग दिनेश वडसे अर्धशतकिय पारी खेल्टी ५७ तथा अविशेव मल्ल अविजित ४३ रन बनैलै । बलिङओर ब्रोड भिजनके दिवस सिंहसे २ विकेट लेलै ।
१ सय ३६ रनके लक्ष्य पछयाइल ब्रोड भिजनसे निर्धारित १५ ओभर खेल्टी ९ विकेट गुमाके ९० रन केल बनाई सेकल । ओकर लाग सन्तोष ताम्राकारसे १९ तथा प्रतिक सिंहसे ११ रन बनैलै । ब्रोड भिजनहे सस्तामे रोक्न क्रममे शारदाके गोविन्द विष्ट ओ रोसन कार्की समान २/२ तथा अरुण धामी, अविशेक मल्ल, विरेन्द्र ठगुन्ना १/१ विकेट लेलै । उ खेलके म्यान अफद म्याच शारदाके अभिशेक मल्ल हुइलै ।
प्रतियोगिता अन्तरगत मंगरके ज्योति इङलिस स्कुल ओ मोर्डन इङलिस स्कुल तथा विद्या भुषण स्कुल ओ थ्रि स्टार बोर्डिङ स्कुल विच क्वाटर फाइलन खेल हुई । विजेता दुई टोली सेमीफाइनल प्रवेश करही ।
