जेलसे सांसद रेशम कहलै– पार्टीके निर्णयमे बाधक नैबनम

पहुरा समाचारदाता
धनगढी, १२ चैत । कैलालीके क्षेत्र नम्बर १ टिकापुरसे विजय हुइल डिल्लीबजार कारागारमे रहल जसपाके सांसद रेशम चौधरी पार्टी सरकारमे जैना नइजैना निर्णयमे बाधक नइबन्न बटैले बटै ।

विफेक रोज कारगारसे विज्ञप्ति निकरटी सांसद चौधरी सरकारमे जैना या नइजैना विषय पार्टीसे टुंग्यइना ओ पार्टीके निर्णय अवज्ञा कैनाबारे अपने कल्पनासम नइकैना बटाइल हुइट । केपी ओली नेतृत्वके सरकारमे जैना विषयमे जसपा ओ एमालेबीच वार्ता चल्टी रहल बेला अपने ओम्ने असहमत रहल कना मेरिक प्रचार हुइल कहटी चौधरी ओम्ने सत्यता नइरहल दाबी करले बटै ।

‘सरकारमे सहभागी हुइना/नइहुइना निर्णय मोर एकल प्रयाससे सम्भव हुइना बाट फे नइहो,’ उहाँक कहाई बा, ‘उ पार्टीके निर्णय हुई । पार्टीसे कैना निर्णयमे बाधक बन्ना बाटके मै कल्पनासमेत करे नइसेकम ।’

सरकारमे जैना/नइजैना विषयमे जसपाभिटर दुई खेमा बा । पूर्व राजपा पक्ष अब्बेक सरकारहे समर्थन जनाके जैना पक्षमे बा कलेसे पूर्वसंघीय समाजवादी पार्टी पक्ष ओकर विरोधमे बा । यी बारे चौधरीहे जोरके प्रचार हुइलपाछे जसपाके नेता राजेन्द्र महतो बुधके डिल्लीबजार कारागार पुगल रहिट ।