अभिनसम आश्वासन केल पैलीः द्वन्द्वपीडित
पहुरा समाचारदाता
धनगढी, १९ चैत । ससस्त्र द्वन्द्वके बेला राज्य तथा गैरराज्य पक्षसे पीडित हुइल द्वन्द्वपीडितहुक्रे अभिनसम आश्वासन केल पाइल बटैले बटै ।
नेपालमे द्वन्द्वपीडितहुकने परिपुरण तथा तत्कालिन आवश्यकताहे सम्बोधन कैना स्थानीय सरकारके भूमिका विषयक बुधके रोज धनगढीमे हुइल जिल्ला स्तरीय संवाद कार्यक्रममे सहभागी द्वन्द्वपीडित रामप्यारी चौधरी उ दुःख पोखल रहिट ।
‘ससस्त्र द्वन्द्वके बेला राज्य तथा गैरराज्य पक्षसे पीडित बनाइल रहे,’ उहाँ कहली, अभिनसम वेपत्ता पारल परिवारसे झन सेवा सुविधासे बञ्चित हुइटी रहल बटै ।’ द्वन्द्वपीडित मन्सेफे एकल महिलाहे बाँच्न गाह्रो हुइटी रहल उहाँ बटैली । सीपमुलक तालिम पश्चात व्यावसायके लाग सहयोग करे सेक्लेसे केल द्वन्द्वपीडितहुकनके परिपुरण तथा तत्कालिन आवश्यकताहे सम्बोधन करे सेक्ना द्वन्द्वपीडित रामप्यारी बटैली ।
एकल महिला समुहके प्रदेश अध्यक्ष सुमन शर्मा सशस्त्र द्वन्द्वके बेला यौन हिंसामे परल महिलाहुक्रे मुद्दाफे गाह्रो हुइटी रहल बटैली ।
‘सशस्त्र द्वन्द्वके बेला ढेर दिदिबहिनीया यौन हिंसाके शिकार हुइलै,’ उहाँ कहली, अब्बे ओइने मन्से ढेर जैसिन लौवा घर बसासेकल बटै, फेरसे पुराने बाट कोटयइलेसे घरबार विग्रे सेकी । स्थानीय तहमे द्वन्द्वपीडितकाहुकनके तथ्याङक नहुके टमान सेवा सुविधासे बञ्चित हुइना अध्यक्ष शर्मा बटैली ।
राष्ट्रिय मानव अधिकार आयोग सुदूरपश्चिम प्रदेश प्रमुख मोहनदेव जोशी विस्तृत शान्ति सम्झौता हुइल ढेर बर्ष हुइलेसेफे मानव अधिकार उल्लंघनके घटनामे कमी नइआइल बटैलै । उहाँ कहलै, शान्ति सम्झौतापाछे मुलुकमे मानव अधिकारके घटनामे कमी अइना जनविश्वास करल रहे मने ओसिन नइहुइल । राज्यपक्ष मानव अधिकारके घटनाप्रति गम्भीर नइहुइल उहाँ बटैलै ।
बार इकाई अध्यक्ष सिद्धराज ओझा द्वन्द्वपीडितहुक्रनसे संचालित सहकारीहे प्रवद्र्धन करे पर्ना बटैले बटैले बटै । कृषि ओ पशुपालन क्षेत्रमे संलग्न द्वन्द्व पीडितहे सहयोग करे पर्नाफे उहाँ जोड डेहल रहिट ।
धनगढी उपमहानगरपालिकाके कार्यपालिका सदस्य प्रेम विक सुदूरपश्चिम प्रदेश सरकारसे द्वन्दपीडित समस्या समाधान विद्येयक नाने पर्ना बटैलै । गैर सरकारी संस्था महासंघ कैलालीके सचिव चेतमान साउद राजनितिसंग जोरके द्वन्द्वकालके पीडकहुकनहे उन्मुक्ती डेटी रहल बटैलै । द्वन्द्वपीडितहुकनके परिपुरण तथा तत्कालिन आवश्यकताहे सम्बोधन कैना योग्यता अनुसार रोजगारीके व्यवस्था करे पर्ना बटैलै ।
धनगढी उपमहानगरपालिका वडा नम्बर ८ के अध्यक्ष नारायण बराल बाहेरसे आइल द्वन्दपीडितहुकनके तथ्याङक संकलन नइकरलेसे राहत ओ सेवा सुविधासे कोई छुटन, कोई दोहरैना बटैलै । टीपीओ नेपालके काउन्सेलर कमला बुढाथोकी द्वन्दपीडित महिलाहुकनहे काउन्सिलिनके आवश्यकता रहल बटैली ।
कार्यक्रममे धनगढी उप महानगरपालिका वडा नम्बर १ के अध्यक्ष सन्तोष मुडभरी, वडा नम्बर ५ के अध्यक्ष हिरासिंह पाटली, वडा नम्बर २ के वडा सदस्य मानबहादुर चौधरी लगायत अपन बाट राखल रहिट ।
समावेशी सक्रमणकालिन न्याय मेलमिलाप तथा द्वन्द समाधानका लागि जिल्ला संजाल कैलालीके अध्यक्ष गणेश मल्लके अध्यक्षतामे हुइल कार्यक्रममे संचालन महिला कानून र विकास मञ्च कैलालीके जिल्ला संयोजक रेणु प्रधान श्रेष्ठ ओ स्वागत सचिव कृष्ण विक करले रहिट ।
कार्यक्रम समावेशी सक्रमणकालिन न्याय मेलमिलाप तथा द्वन्द समाधानका लागि जिल्ला संजाल कैलाली, महिला कानून र विकास मञ्च कैलाली ओ इन्टरनेशनल एलर्टसे सयूक्त रुपमे करले रहे ।
