धनगढी मेयर उपमेयर कप फुटवल प्रतियोगिता
पहुरा समाचारदाता
धनगढी, २० फागुन । धनगढी उपमहानगरपालिका नगर खेलकुद समितिके आयोजनामे हुइटी रहल धनगढी मेयर उपमेयर कप फुटबल प्रतियोगिताके उपाधिके लाग शुकके खेल हुइना बा ।
महिला तथा पुरुषओरके दुनु फाईनल खेल शुकके वडा नम्बर ७ स्थित कालिका मन्दिरके खेल मैदानमे हुइना बा । महिलाओरके उपाधिके लाग वडा नम्बर १२ ओ वडा नम्बर १९ भिरना हुइल बटै ।
पुरुषओरके उपाधिके लाग वडा नम्बर १२ ओ वडा नम्बर ७ प्रतिस्पर्धा कैना हुइल बटै । फुलबारीस्थित डी गाउँके खेल मैदानमे हुइल पुरुषओरके पहिल सेमीफाईनलमे वडा नम्बर ७ वडा नम्बर १६ हे ३–१ से हराइल । दुसरा सेमीफाईनल खेलमे भर वडा नम्बर १२ वाकओभर पैटी फाईनल पुगल ।
वडा नम्बर १४ मै रहल फुलबारीस्थित खेल मैदानमे हुइल दुसरा सेमीफाईनलमे वडा नम्बर १४ ओ वडा नम्बर १२ बीचके खेल दर्शक मैदान प्रवेश करके रेफ्रीउप्पर हातपात करे खोजलपाछे खेल रोकल रहे । ओकरपाछे वडा नम्बर ७ के खेल मैदानमे खेल खेलक लाग वडा नम्बर १४ अनुपस्थित हुइलपाछे वडा नम्बर १२ फाईनल पुगल हो ।
फुलबारी स्थित खेल मैदानमे हुइल महिलाओरके दुनु सेमीफाईनलमे जित हात परटी वडा नम्बर १२ ओ १९ उपाधिके लाग भिरना यी आघे फाईनल पुगसेकल बटै । प्रतियोगितामे प्रथम महिला÷पुरुष टिमहे १ लाख १ हजार नगद पुरस्कारके साथे मेडल ट्रफी ओ प्रमाणपत्र, दुसरा हुइना टिमहे ५१ हजार नगद मेडल ट्रफी ओ प्रमाणपत्र पैना प्रतियोगिताके संयोजक दिपेन्द्र सिंह जानकारी डेलै ।
उहाँक अनुसार सर्वोत्कृष्ट खेलाडीहे ५ हजार ५ सय नगद मेडल ट्रफी ओ प्रमाणपत्र, उत्कृष्ट गोलकिपरसे ५ हजार ५ सय नगद मेडल ट्रफी ओ प्रमाणपत्र, उत्कृष्ट डिफेन्सरसे ५ हजार ५ सय नगद मेडल ट्रफी ओ प्रमाणपत्र, सर्वाधिक गोलकर्तासेफे ५ हजार ५ सय नगद मेडल ट्रफी ओ प्रमाणपत्र प्राप्त करही ।
फुटवल प्रतियोगिताके व्यवस्थापन न्यू बुद्ध स्पोटर्स यूवा क्लव, मनकामना यूवा क्लव, नमोबुद्ध यूवा क्लव ओ कैलाली जिल्ला फुटवल संघसे करले बा ।
