टमान कार्यक्रम कैके सहकारी दिवस मनागिल
पहुरा समाचारदाता
पहलमानपुर, २० चैत । ‘मर्यादित व्यवसाय ओ प्रविधिमे सहकारी’ मुल नाराके साथ घोडाघोडी नगरपालिका वडा नम्बर १० पहलमानपुरमे सहकारी दिवस मनागिल बा ।
कार्यक्रम दिगो सामुदायिक तथा वातावरण संरक्षण बहुउद्देश्यीय सहकारी संस्था, आधुनिक साना किसान कृषि सहकारी संस्था, न्यू अप्तड त्रिवेणी सहकारी संस्था, मोहन्याल बचत तथा ऋण सहकारी संस्था, जिविका कृषि सहकारी संस्था, ग्रामीण कृषक बहुउद्देश्यीय सहकारी संस्थाके संयुक्त आयोजनामे हुइल रहे ।
कार्यक्रम दिगो सामुदायिक तथा वातावरण संरक्षण बहुउद्देश्यीय सहकारी संस्थाके अध्यक्ष पुष्कलबहादुर बमके घरगोसियाके हुइल रहे । उहाँ सहकारी संस्थासे गरिबहुकनके जीवनस्तर उठैना सहयोग करल बटैलैं ।
कार्यक्रममे खप्तड सहकारीके अध्यक्ष भीम बम सहकारी अपन उद्देश्यके साथ काम करेपरना बटैलैं । अस्टेक धनगढी पोष्ट दैनिकके सम्पादक कर्ण शाह सहकारीसे सदस्यहुकनके हीत हुइना मेरिक सेवासुविधामे ध्यान डेहेपरनामे जोड डेलैं ।
कार्यक्रममे नेपाल पंक्षी संरक्षण मञ्चके हिरुलाल डंगौरा आर्थिक विकासके सँगे वातावरण, जैविविधताके विकास फेन करे परना बटैलैं । नेपाली काँग्रेसके प्रदेश सभापति लक्ष्मण शाही किसानहुक्रे सहकारीसे सर्वसुलभ ओ सही समयमे मल, विया डेहेपरना अनुरोध करलैं । ओस्टेक कार्यक्रममे कान्तिराज्यलक्ष्मी माविके विद्यालय व्यवस्थापन समिति अध्यक्ष खडकबहादुर रावत सहकारी विकासके लाग सबओहोरसे समन्वय करेपरनामे जोड डेलैं ।
ग्रामीण कृषक बहुउद्देश्यीय सहकारी संस्थाके अध्यक्ष खम्मा शाह स्वागत करल कार्यक्रमके सञ्चालन माहेन्याल सहकारीके अध्यक्ष बजिरसिंह बम करले रहिट ।
सहकारी दिवसके अवसरमे रक्तदान
सहकारी दिवसके अवसरमे लम्कीचुहा नगरपालिकामे रक्तदान हुइल बा ।
वडा नम्बर १ लम्कीमे रहल हाम्रो समाज शक्ति ग्रामीण विद्युत सहकारी संस्थाके आयोजनामे सहकारी दिवसके अवसरमे रक्तदान करगिल हो । ‘मर्यादित व्यवसाय ओ प्रविधिमे सहकारी’ कना मुल नारा सहित ६४ औं राष्ट्रिय सहकारी दिवसके अवसरमे नेपाल रेडक्रस सोसाइटी बलिया उपशाखा लम्कीके समन्वय तथा नेपाल रेडक्रस सोसाइटी सुदूरपश्चिम प्रादेशिक रक्तसञ्चार केन्द्र धनगढीके प्राविधिक सहयोगमे रक्तदान कार्यक्रमके आयोजना करल हो ।
हमार समाज शक्ति ग्रामीण विद्युत सहकारी संस्थाके अध्यक्ष मकर बिष्टके सभापतित्वमे हुइल रक्तदान कार्यक्रमके सुदूरपश्चिम प्रदेश सभा सदस्य रतन बहादुर थापा रक्तदान कैके कार्यक्रमके उद्घाटन करल रहिट । रक्तदान कार्यक्रममे एक सय अठार पिन्ट रगत संकलन हुइल नेपाल रेडक्रस सोसाइटी बलिया उपशाखा लम्कीके सभापति रंगप्रसाद तिमिल्सैना जानकारी डेलै ।
सामाजिक उत्तरदायित्व अन्तर्गत राष्ट्रिय सहकारी दिवसके अवसरमे संस्थासे रक्तदान कार्यक्रमके आयोजना करल सहकारी संस्थाके सचिव दीपक पुन बटैलै ।
कार्यक्रमके बर्का पहुना समेत रहल प्रदेश सभा सदस्य थापा रक्तदान जैसिन महान कार्यमे सहभागी सक्कु जनहनहे धन्यवाद व्यक्त करल रहिट ।
