प्रदेशमे रावल ओ ओली प्यानल मैदानमे
पहुरा समाचारदाता
धनगढी, २१ चैत । नेपाल पत्रकार महासंघ सुदूरपश्चिमके लावा नेतृत्व चयनके लाग चैत २५ गते बुधके निर्वाचन हुइटी बा । नेपाल प्रेस युनियन, प्रेस सेन्टर, प्रेस चौतारी (माधव नेपाल निकट) लगायतके टमान १२ संगठन संयुक्त प्यानल ओ प्रेस चौतारी प्यानल चुनावी प्रतिस्पर्धामे उत्रल बावै । लावा नेतृत्वके संयुक्त प्यानलसे योगेश रावल ओ प्रेस चौतारीसे कृष्ण ओलीके टीम प्रतिस्पर्धाके लाग मैदानमे उत्रल बाटै ।
उपाध्यक्षमे प्रेस यूनियनसहितके संयुक्त प्यानलसे योगेन्द्रबहादुर बलायर ओ प्रेस चौतारी प्यानलसे लक्ष्मण तिवारी प्रतिस्पर्धामे उत्रल बाटै । महासचिवमे यूनियनसहितके संयुक्त प्यानलसे रामसिँह ठगुन्ना ओ चौतारीसे शिवराज भट्ट, सचिव (समावेशी)मे संयुक्तसे प्रेम चुनारा ओ चौतारीसे बलबहादुर चदारा, सचिवमे संयुक्त प्यानलसे हरिप्रसाद जोशी, प्रेस चौतारीसे नरेन्द्र सिंह कार्की ओ कोषध्यक्षमे रामबहादुर धामी संयुक्तसे ओ चौतारीसे नरेशकुमार शाही बिच प्रतिस्पर्धा हुइना हुइल बा ।
खुल्ला सदस्यमे गगन बहादुर ऐडी, चन्द्रबहादुर थापा, जनकबहादुर खड्का, तपेन्द्र कुवँर, दीर्घ खत्री, दीपेन्द्र भण्डारी, धर्मेन्द्र बिसी, भागिरथ अवस्थी ओ वीरबहादलुर गडाल बिच प्रतिस्पर्धा हुइना हुइल बा ।
दलित सदस्यमे गोकर्ण दयाल, धनबहादुर विक ओ भीम विकके बिच प्रतिस्पर्धा हुइना हुइल बा । आदिवासी–जनजाती सदस्यमे रामबहादुर (दहित) चौधरी, रामलखन चौधरी ओ रामचन्द्र कुश्मी बिच प्रतिस्पर्धा हुइना बा ।
ओस्टके सदस्य (महिला) संयुक्त ओर कालीमैया चौधरी, रामदुलारी राना, बन्दना बम ओ प्रेस चौतारीके सविता जोशी बिष्ट प्रतिस्पर्धा हुइना हुइल बा ।
यहोर पत्रकार महासंघ महिला उपाध्यक्षमे प्रेस चौतारी प्यानलके रेणु कार्की ओ सदस्य अल्पसंख्यक/अपांगमा चौतारीके नहकुल देव जीसी निर्विरोध निर्वाचित होसेकल बाटै । आब बाँकी १० पदके लाग ३२ जाने चुनावी मैदानमे उत्रल बाटै ।
के हुइट् रावल ?
विगत २१ बरससे पत्रकारितामे सक्रिय रहल योगेश रावल कैलालीके पत्रकार हुइट । नागरिक दैनिकमे टीकापुरसे काम कैटी आइल रावल नेपाल पत्रकार महासंघ सुदूरपश्चिम प्रदेश समितिके निवर्तमान महासचिव समेत हुइट । आघेक चुनावमे रावल प्रेस युनियनसे महासचिवमे निर्वाचित हुइल रहिट ।
टीकापुरसे प्रकाशित हुइना सहस्राब्दी साप्ताहिकसे संवाददाताके रुपमे पत्रकारिता सुरु करल रावल कैलालीसे प्रकाशित हुइना युगयान, हाम्रो जनसन्देश, टीकापुर टाइम्स, अनुमोदन, सेती समाचार, पश्चिम टुडे दैनिकमे काम करसेकल बाटै ।
ओस्टके, रेडियो पश्चिम टुडे, राजधानी दैनिक, सगरमाथा टेलिभिजन, सेतोपाटी डटकममे काम करल उहाँ अब्बे नागरिक दैनिक ओ हाम्रो पत्र डटकममे आबद्ध बाटै ।
रावल प्रेस स्वतन्त्रता ओ नागरिक अधिकारके लाग आपन उम्मेदवारी रहल बटैले बाटै । टमान १२ ठो पेशागत संगठनसे आपनहे साझा उम्मेदवारके रुपमे आघे सारल ओरसे महासंघहे सक्षम नेतृत्व डेहे सेक्ना क्षमता रहल उहाँ बटैले बाटै ।
रावल पत्रकार महासंघमे सक्कु जनहनहे समेटके साझा चरित्रके संस्थाके गरिमाहे थप उचाइमे पुगैना लक्ष्य रहल जनैलै ।
के हुइट ओली ?
प्रेस चौतारी प्यानलसे अध्यक्षके लाग चुनावी प्रतिस्पर्धामा उत्रल कृष्ण ओली २०६५ सालसे सक्रिय पत्रकारिता कैटी आइल बाटै । पूर्वाञ्चल विश्वविद्यालय अन्तरगतके सेफर्ड कलेजमे मिडिया टेक्नोलोजीमे स्नातकोत्तर करल ओली हाल नागरिक दैनिकमे काम कैटी आइल बाटै ।
नागरिक दैनिकके बाजुरा संवाददाताके रुपमे कार्यरत ओली इहीसे आघे टमान मिडियामे काम करसेकल बाटै । रेडियो बजुरासे पत्रकारिता सुरु करल ओली सगरमाथा टेलिभिजनमे ३ बरस काम करल अनुभव रहल बा । ओली श्रमजीवी पत्रकारहुक्रनके हक अधिकार स्थापीत कैना अपने कटिबद्ध रहल बटैलै ।
