मेरुदण्डके हड्डी टुटल महिला उपचारपाछे घर लौट्ली
पहुरा समाचारदाता
धनगढी, २६ चैत । डोटीके आदर्श गाउँपालिका ७ के हरिना विष्टके कपार ओ गर्दन जोरना मेरुदण्डके हड्डी टुटलके सफल उपचारपाछे घर लौटल बाटी । उहाँ चैत्र १४ गते भिरमे घाँस काटेबेर गिरके मेरुदण्डके हड्डी टुटल रहे ।
स्थानीय अस्पतालमे उपचार सम्भव नैहुइलपाछे उहाँहे उपचारके लाग धनगढीस्थित निसर्ग हस्पिटल एन्ड रिसर्च सेन्टरमे नालन रहे । उपचार पाछे उहाँ बिफेक रोज घर लौटली ।
उहाँ गोसिया बहादुर विष्ट कलैं, ‘गिरके शरीरभर रगत लतपत रहे । शरीर पुरै लुल रहे । सास किल रहे । हम्रे टे आसा मारसेक्ले रहि । यहाँ नानलपाछे मोर गोसिनिया बच्ली ।’
निसर्ग हस्पिटलके न्यूरो सर्जन डाक्टर सुरेश सापकोटा, हाडजोर्नी रोग विशेषज्ञ डाक्टर श्रीराम खाती, ओमकार विष्ट, एनेस्थेसियोलोजिस्ट डाक्टर हेमन्त ओझा, यादब जोशी, सुरज सुबेदी, लक्ष्मी खत्री, कल्पना बुढालगायतके टिम विष्टके शल्यक्रिया करले रहे ।
‘बिरामीके कपारमे गहिर चोट रहे, टपारहे गर्धनमे अट्कैना मेरुदण्डके दोसर हड्डी फेन टुटल रहे’, डाक्टर सापकोटा कलैं, ‘बेहोस अवस्थामे आइल बिरामी शल्यक्रियापाछे पाँचौ दिनमे हम्रे उहाँहे डिस्चार्ज करली ।’
कुछ दिन पहिले निसर्ग प्रदेशमे पहिलचो ‘ब्रेन ट्युमर’के सफल उपचार करले रहे ।
