अर्थतन्त्र फे धरापमे

सरकारके पछिल्का निर्नयले नेपालके अर्थतन्त्र फे धरापमे परना अवस्ठा आइल बा । स्वास्थ्य तथा जनसंख्या मन्त्रालयसे बुधके रोज विग्यप्टि जारि कैटि रात्रिकालीन व्यवसाय ओ रेस्टुरेन्ट रात ९ बजेपाछे बन्द कैना आग्रह करल बा । कोरोना संक्रमण नियन्त्रणके लाग जनस्वास्थ्य मापदण्डके उल्लंघन ओ कोरोनाके बेलायत भेरियन्टके बढ्टी दरहे मध्यनजर करटी रात्रिकालीन व्यवसाय कडाइके साथ बन्द करैना आग्रह कैगैलक हो । इ फरमान सक्कु जिल्ला प्रशासन कार्यालयहे जारि कैगिल बा ।

ओस्टेक ढेर भिडभाड हुइना ठाउँ सपिङ मल, सलिमा हल, नाचघर, हेल्थ क्लब, स्वीमिङ पुल, पार्टी प्यालेस, मठमन्दिरलगायत क्षेत्रमे उच्च स्वास्थ्य सुरक्षा सावधानी अपनैना मन्त्रालय आग्रह करले बा । भर्खर अर्थतन्त्र चलायमान हुइटि रहे । सरकारके इ निर्नयले व्यवसायी निरास हुइना अवस्ठा सिर्जल बा । विदेशसे अइना टमान टोली वा भ्रमण दलके सदस्यहुकनके संख्या ओ क्वारेन्टिनके नियममे फे कडाइ कैना मन्त्रालयके आग्रह बा । भख्खर नेपालके मेरमेरिक पर्बट्वा चौंह्रक लग ३७ ठो टोलिक ३ सयसे उपर पर्वटारोहि अनुमति पाइल समाचार आइल रहे । इ सुचनाले पर्यटन गन्तव्य फेन उँटमुटावन अवस्ठामे आइल बा ।

छिमेकि देश भारतमे अब्बे रोटडिन १ लाखसे उपर कोरोना संक्रमितके दर बह्रटि बा । ओहेसे नेपाल सरकार फेन उच्च सतर्कता अपनैना स्वाभाविक हो । बरा सहरमे ५ सय से ढेर ओ छोट सहरमे १ सय से ढेर सक्रिय संक्रमित विल्गैलेसे उहाँ आवागमनमे कडाइ कैनाफे मन्त्रालय जनैले बा । सरकार निर्नय टे करठ, मने उंलग्घन अपनेहे करठ । जस्टे कि भिडभाड कैके होरि नै मनैना कले रहे । मने मन्त्री, सांसदलोग अपनेहे बरा उपस्थिति रहल होरिक शुभकामना लेना, डेना कार्यक्रममे सहभागि रलाँ । सरकारी दल जो बरा बरा आमसभा करल । उहेसे सरकार सर्वसाढारनहे किल हप्कि डप्कि लगैनासे फेन अप्नेहे नियमके पालनामे लग्ना चाहि ।

कोरोना संक्रमितके पहिचान कैना, कन्ट्याक्ट ट्रेसिङ बढैना, आवश्यकताअनुसार पीसीआर परीक्षण बढैना फे मन्त्रालय सम्बन्धित स्वास्थ्य कार्यालय ओ स्थानीय तहहे आग्रह करले बा । सरकार आग्रह किल कर्ना कि प्राथमिकता डेके लग्ना इ अहम् सवाल हो । पहिला कोरोना खोप लगाइल मनै डोसर चरनके खोप पाइ नै सेक्ठुइटै । खोप नैलगैलक मनै कहिया पाला पैना अटापटा नैहो । सरकार नागरिकके स्वास्थ्य रक्षा संगसंगे अर्थतन्त्र चलायमानके उपाय करे । सरकार अपन उपस्थिति डेखाए ।