नाकामे कोरोना चेकजाँच फितलो
पहुरा समाचारदाता
धनगढी, ३० चैत । कोरोना भाइरस कोभिड– १९ के डुसरा चरणके लहरके असर सुदूरपश्चिम प्रदेशमे फेन डेख परल बा । मने, सुदूरपश्चिममे कोरोना जोखिम बह्रलेसे फेन आइसियू भेन्टिलेटर भर बह्रल नैहो ।
चिकित्सक कोरोनाके डुसरा लहर ढिउर जटिल खालके रहना कहटी ढिउरहे आइसियू ओ भेन्टिलेटर आवश्यक पर्ना बटैले बाटै । गैल ८ चैतसे कञ्चनपुरमे कोरोना पजिटिभके संख्या बह्रल बा ।
भारतसे आइलहुक्रनके एन्टिजेन परीक्षण करेबर सात नाकामध्ये कञ्चनपुरमे ढिउर संक्रमित भेटल बााटै । स्वास्थ्य मन्त्रालयके पाछेक तथ्यांकसे फेन सुदूरपश्चिम उच्च जोखिममे रहल डेखैले बा ।
मने, प्रदेशमे आवश्यक पर्ना आइसियू ओ भेन्टिलेटरके व्यवस्थापन हुइल नैहो । पहिले फेन सुदूरपश्चिममे सघन उपचार कक्षके अभाव रहे । अँट्वारके भारतसे नेपाल प्रवेश करलमध्ये ६४ जनहनमे कोरोना पुष्टि हुइल रहे । उहाँहुक्रे सक्कु कञ्चनपुरमे पुष्टि हुइल हुइट ।
स्वास्थ्य मन्त्रालयके सहायक प्रवक्ता डा. समीरकुमार अधिकारीके अनुसार सुदूरपश्चिम प्रदेशमे हालसम चार सय ९४ जनहनमे संक्रमित पुष्टि हुइल बावै । संक्रमितमध्ये ८७ जाने अस्पतालमे रहल बाटै । मने, प्रदेशभरमे आइसियू २९ ओ भेन्टिलेटर २५ किल बावै ।
ठप १५ जनहनमे कोरोना पुष्टि
सुदूरपश्चिममे ठप १५ जनहनमे कोरोना पुष्टि हुइल बा । सोम्मारके सेती प्रादेशिक अस्पताल प्रयोगशाला परीक्षणमे ७२ नमूना परीक्षण करेबर १५ जनहनमे संक्रमण पुष्टि हुइल अस्पतालके सूचना अधिकारी दिलिपकुमार श्रेष्ठ जानकारी डेलै । ओहकान अनुसार कैलालीके जोशीपुर ७ के ३, जानकी गाँउपालिका २ के एक जाने, कैलालीके गोदावरी नगरपालिका ७ के एक जननहनमे कोरोना संक्रमण पुष्टि हुइल बटैलै ।
ओस्टके धनगढी उपमहानगरपालिका वडा नम्बर २, ३, ८ ओ १२ के एक–एक जाने, टीकापुर नगरपालिका ९ के एक जाने गोदावरी नगरपालिका ३ ओ ७ के एक–एक जाने, कञ्चनपुरके भिमदत्त नगरपालिका ४ ओ १० के एक–एक जाने, कृष्णपुर नगरपालिका २ के एक जाने रहल सूचना अधिकारी श्रेष्ठ जानकारी डेलै ।
अब्बे अस्पतालमे कुल संक्रमित मध्ये २ जाने आइसियू १ जाने भेन्टिलेटर ओ एकजाने आईशोलेशनमे राखल जनाइल बा ।
कोरोना संक्रमित एक पुरुषके मृत्यु
कैलालीके गोदावरी नगरपालिका–३ के ५० वर्षीय पुरुषके कोरोना भाइरस संक्रमणके कारण मृत्यु हुइल बा । कडा खालके निमोनियासे अवस्था जटिल हुइलपाछे अँटवार रात अस्पताल पुगल उहाँक नमूना परीक्षण करेबेर कारोना संक्रमणके पुष्टि हुइल रहे ।
सेती प्रादेशिक अस्पताल धनगढीके सूचना अधिकारी दिलीपकुमार श्रेष्ठ अँटवार रात भर्ना हुइल उहाँक अस्पतालके भेन्टिलेटरमे उपचारके क्रममे सोम्मार सकारे मृत्यु हुइल जानकारी डेलै । गैल फागुनमे उहाँ भारतसे घर लौटल जनाइल बा । । सेती प्रादेशिक अस्पतालमे सक्रमित चार जहनके उपचारके व्यवस्थापन हुईटी रहल बा । सक्रमितसे दुई जहनके भेन्टिलेटरमे ओ एक जने आइसियुमे उपचार हुईटी रहल बा सूचना अधिकारी श्रेष्ठ कहलै, ‘फागुन १० गते यहोर कोरोनाके कारण हुईन मुवल दर अस्पतालमे शुन्य रहल ओरसे सोम्मार ५० दिनपाछे एक जाने सक्रमितके मृत्यु हुइल हो ।’
पछिल्का हप्तामे भारतमे यी रोगके संक्रमण ओ मृत्यु दर बढलसंगे नेपालमे यी रोग फैल्ना जोखिम विल्गाइल बा । सुदूरपश्चिम प्रदेशसंग सीमा जोरल भारतके उत्तर प्रदेशमे कोरोनाके संक्रमण बह्रलसंगे यहाँक शैक्षिक संस्था बन्द करल बा । महेन्द्रनगरस्थित महाकाली अस्पतालमे उपचाररत एक जाने संक्रमितकेफे कुछ दिनआघे मृत्यु हुइल रहे । रोग फैले नइडेना सचेतना कार्यक्रम सञ्चालन हुइटी रहलेसेफे स्वास्थ्य सुरक्षाके मापदण्डके पालनामे हुइटी रहल लापरवाहीसे कोरोना भाइरसके जोखिम बढ्न विल्गाइल श्रेष्ठ बटैलै ।
मास्क नइलगाके नेंग्ना, एक आपसमे भौतिक दूरी कायम नइकैना जैसिन स्वास्थ्य सुरक्षाके मापदण्ड नइअपनाके सुदूरपश्चिम प्रदेशमे कोरोनाके उच्च जोखिम विल्गाइल बा । पछिल्का दिनमे प्रदेशमे यी रोगके संक्रमण दर बढटी गैल बा । स्वास्थ्य निर्देशनालय दिपायलके तथ्याङक अनुसार पछिल्का तीन हप्तामे १२७ जनहनमे संक्रमणके पुष्टि हुइल बा ।
