उपाध्यायहे कोभिड हिरो सम्मान
पहुरा समाचारदाता
धनगढी, ३० चैत । धनगढी उपमहानगरपालिका जनस्वास्थ्य निरीक्षक लक्ष्मीराज उपाध्याय ‘कोभिड हिरो’ के सम्मान पैले बटै ।
कोरोना महामारी नियन्त्रण ओ रोकथामके अहोरात्र खटल उपाध्यायहे ईन्टेग्रेटी आईकोन नेपालसे कोभिड हिरोमे छनौट करल हो । सुशासनके क्षेत्रमे काम करटी आइल यी संस्थासे देशभरमे तीन जनहनहे कोभिड हिरोज छनौट करले बा ।
जनस्वास्थ्य निरीक्षक उपाध्याय स्वाब संकलन, क्वारेन्टाइन व्यवस्थापन, कोरोना उपचार केन्द्र व्यवस्थापन ओ भारतसे लौटल नेपालीहे सम्बन्धित जिल्लासम सुरक्षित पुगैना प्रभावकारी भूमिका निर्वाह करले रहिट ।
धनगढी उपमहानगरपालिकासे अँटवार एक कार्यक्रमके आयोजना करटी जनस्वास्थ्य निरिक्षक उपाध्यायहे सम्मान करल हो । कोभिड हिरो छनौट हुइल उपाध्यायहे नगर उपप्रमुख सुशीला मिश्रभट्ट, प्रमुख प्रशासकीय अधिकृत हरिबहादुर चन्द, कोभिड उपसमितिके संयोजक नारायणप्रसाद बराल लगायतसे खादा, टिका लगाके सम्मान करल रहिट । कोभिडके जोखिमके विच उपमहानगरपालिकाके स्वास्थ्यकर्मीहुक्रे खेलल भूमिकाके उच्च सम्मान करटी सम्मान कार्यक्रममे बोल्टी नगर उपप्रमुख सुशीला मिश्र भट्ट कहली, कोभिड हिरोमे छनौट हुइल जनस्वास्थ्य निरीक्षक उपाध्यायहे बधाई तथा शुभकामना डेहे चाहटी ।
मजा काम कैना व्यक्तिके प्रत्यक्ष ओ अप्रत्यक्ष रुपमे मुल्याङ्कन हुइना करल बटैटी उपप्रमुख भट्ट कहली, जनस्वास्थ्य निरीक्षक उपाध्यायहे कोभिड हिरो छनौट कैना संस्थाहे धन्यवाद डेहे चाहटी । कोभिड उपसमितिके संयोजक नारायण प्रसाद बराल धनगढी उपमहानगरपालिकासे कोभिडके समयमे उत्कृष्ठ काम करल बटैलै । उहाँ कहलै, ओकर मूल्याङ्कन हुइलमे आयोजक संस्थाहे धन्यवाद डेहे चाहठी । धनगढी उपमहानगरपालिकाके प्रमुख प्रशासकीय अधिकृत हरिबहादुर चन्द यैसिन सम्मानसे कर्मचारीहुकनहे उत्कृष्ठ काम कैना उत्प्रेरित कैना बटैलै ।
सम्मान पाइलपाछे जनस्वास्थ्य निरीक्षक उपाध्याय कोभिड हिरोके सम्मानमे धनगढी उपमहानगरपालिकाके स्वास्थ्यकर्मी, कर्मचारी ओ जनप्रतिनिधीहुकनके योगदान रहल बटैलै । उहाँ कहलै, कोभिडके जोखिमके समयमे सक्कु जाने खटल रही, यी धनगढी उपमहानगरपालिकाके सम्मान हो ।
