कैलालीमे ६ हजार हेक्टर वन क्षेत्रमे आगलागी
पहुरा समाचारदाता
धनगढी, ३१ चैत । कैलालीमे ६ हजार हेक्टरसे ढिउर वन क्षेत्रमे आगलागी हुइल बा । डिभिजन वन कार्यालय धनगढीके अनुसार चैतमे किल जिल्लाभर ६ हजार हेक्टरसे ढिउर वन क्षेत्रमे आगलागी हुइल बा ।
चुरे ओ तराईके वनमे दर्जनौँ ठाउँमे अब्बे फेन आगलागी हुइल बा । वनुवामे राह फैलटी गैलेसे फेन सम्बन्धित निकायसे आगलागी नियन्त्रणके प्रयास हुइल नैहो । डिभिजन वन कार्यालय धनगढीके प्रमुख रामचन्द्र कँडेल कुछ अँठ्वार यहोर कैलालीमे करिब ६ हजार हेक्टर वन क्षेत्र आगलागीमे परल बटैलै । सबसे ढिउर चुरेके वनमे आगलागी हुइल उहाँ बटैलै । चुरेके आगलागी अब्बे फेन नियन्त्र हुइल नैहो । चुरेसँग जोरल तराईके वनुवामे फेन आगलागीके घटना बह्रल बा ।
चुरेसंगे जैविक विविधतासे महत्वपूर्ण मानजैना वसन्ता जैविक मार्ग ओ घोडाघोडी सीमसार क्षेत्रके वनुवामे दर्जनौँ ठाउँमे आगलागी हुइल बा । संरक्षणकर्मी हिरुलाल डगौरा घोडाघोडी सीमसार क्षेत्रमे पर्ना बनुवामे आगलागी बह्रल बटैलै ।
चुरे वन ओ भारतके दुधुवा नेसनल पार्कसंग जोरल वसन्ता जैविक मार्गके कैयौँ ठाउँमे आगलागी हुइल उहाँ बटैलै । आगलागीसे छोटछोट बिरुवा ओ बुट्यान नष्ट हुइनाके साथे वन्यजन्तु ओ चराचुरुंगीके बासस्थान नासल बावै । वन्यजन्तु ओ चराचुरुंगी लोप हुइना अवस्थामे पुग्ना कहटी संरक्षणकर्मी चिन्ता व्यक्त करले बाटै ।
