धनगढी फन पार्क १९ महिनापाछे पुनः सञ्चालनमे

पहुरा समाचारदाता
धनगढी, ३ बैशाख । कोरोना भाइरस (कोभिड १९) से प्रभावित धनगढी फनपार्क पुनः सञ्चालनमे आइल बा ।

कैलालीके धनगढीमे २० करोडके लगानीमे सञ्चालित फन पार्क कोभिड प्रभावितसे १९ महिना बन्द हुइल रहे । सरकारसे विगत कुछ महिना यहोर स्वास्थ्य मापदण्ड अपनाके रेष्टुरेन्ट लगायतके व्यवसाय सञ्चालन कैना आदेश डेहलपाछे फन पार्क फेन पुन सञ्चालनमे आइल सञ्चालक उपेन्द्र विष्ट जानकारी डेलै ।

ओहकान अनुसार कोभिडसे बैंकके किस्ता तिर्न समेत कर्रा हुइल ओरसे धनगढी फनपार्क सञ्चालनमे लानल बटैलै । स्वास्थ्य मापदण्द अपनाके रेष्टुरेन्ट ओ फनपार्क सञ्चालनमे लानल उहाँ बटैलै । स्वीमिङ्ग करे चहुइयाहे फेन सावधानी अपनाके सेवा डेना तयार रहल विष्ट बटैलै ।

धनगढी उपमहानगरपालिका–२ पुरान भन्सार रोडमे अवस्थित फनपार्क दुई बरसके समयावधिमे निर्माण सम्पन्न होके सञ्चालनमे आइल रहे । मने मजासे सञ्चालन हुइ नैपैटी कोभिडसे प्रभावित हुइल रहे । जेकर कारण १९ महिनासम बन्द होके धनगढी फनपार्क डेढ करोडके हाराहारीमे घाटा हुइल व्यवसायी श्याम विष्ट बटैलै ।

उहाँ कहलै–‘हम्रहीनहे बैंकसे ढिउर कर्रा हुइल । तीन महिने सूचना समेत जारी करसेकल ओरसे फनपार्क खोल्नाके विकल्प नैडेखल बटैलै ।’

विष्ट कुछ बरस कोरिया बसाइँपाछे नेपाल आके इ क्षेत्रमे फनपार्कके सम्भावना देखेर पार्क निर्माण करल बटैटी कहलै– “इ क्षेत्रमे हरेक बरस आयोजना हुइटी आइल टमान खाले मेला तथा महोत्सवमे दर्शकहे मनोरञ्जन प्रदान कैना उद्देश्यसे फेन व्यापारिक प्रयोजनके लाग किल सञ्चालन करजैना हुइल ओरसे पार्क निर्माणके उद्देश्य व्यापारिक प्रयोजन मात्र नैहोके आन्तरिक तथा बाह्य पर्यटकहे मनोरञ्जन प्रदान कैना हो ।”

उहाँ अब्बेक सक्कु क्षेत्रके व्यवसाय घाटामे चल्टी रहल ग्राहकके विश्वास जितके धनगढी फनपार्क मजा पर्यटकीय गन्तव्य बनाइ सेक्ना आशा पलाइल बटैलै । उहाँ विगतके बरसमे फेन ६० प्रतिशत पर्यटक भारतीय रहल दाबी करलै ।

झण्डै अढाइ बिगाह क्षेत्रफलमे निर्माण करल फनपार्कमे स्वीमिङ पुलसहित वेब पुल, किड्स पुल, मल्ट्रिल्याण्ड स्लाइड, ट्युवलाईट स्लाइड, पेन्डुलम, म्युजिकल फनटेन, ब्रेक डान्सलगायतके जलविहारमे आनन्द लेहे सेकजैना सेवा उपलब्ध बावै ।

साथे फनपार्कमे रेष्टुरेन्टके समेत व्यवस्था करल बा । बाहरसे अउइया पर्यटकहे रमाइक लाग आवश्यक स्थान नैहुइलपाछे फनपार्क निर्माण करल औरे सञ्चालक विष्ट बटैलै ।

पार्क निर्माणसे स्थानीयस्तरमे करल करोडौंके लगानीसे स्थानीयवासीहे रोजगारीलगायत लाव गन्तव्यसमेत थपल बा ।