सुदूरपश्चिममे ७३.२ किमि हुलाकी राजमार्ग निर्माण
पहुरा समाचारदाता
धनगढी, ५ बैशाख । सुदूरपश्चिम प्रदेशमे हालसम ७३.२ किलोमिटरमे हुलाकी राजमार्ग निर्माणके कार्य पूरा हुइल बा । कैलाली ओ कञ्चनपुर कैके दुई जिल्लामे जम्मा १२४ किलोमिटर रहल हुलाकी राजमार्गमे हालसम ७३.२ किलोमिटरमे कालोपत्रे कैना कार्य पूरा हुइल हो । आभिन ५०.८ किलोमिटरमे कालोपत्रेके काम बाँकी रहल बा ।
कैलालीमे हुलाकी राजमार्ग निर्माणके कार्य लगभग अन्तिम चरणमे पुग्लेसे फेन कञ्चनपुरमे आभिन ढिउर काम बाँकी रहल बा । पूर्व सत्तीसे पश्चिम धनगढीसम जम्मा ६२ किलोमिटर दूरी रहल कैलालीमे हुलाकी राजमार्ग निर्माणके कार्य ५६.२ किलोमिटरमे पूरा होसेकल बा ।
सन् २०१० से कैलालीमे हुलाकी सडक निर्माणके कार्य सुरु हुइल रहे । कुछ बरससम भारतीय निर्माण कम्पनी जीआर गावर काम कैके अधुरो सडक नेपाल सरकारहे हस्तान्तरण करल रहे ।
ओकरपाछे नेपाल सरकारसे अपने लगानीमे राजमार्ग निर्माणके कार्य आघे बह्रैटी गैलमे इ जिल्लामे हुलाकी राजमार्ग निर्माणके कार्य लगभग पूरा हुइना क्रममे रहल हुलाकी राजमार्ग आयोजनाके कार्यालय जानकारी डेले बा ।
आब बसन्ता करिडोरमे चार किलोमिटर, धनगढीमे डेढ किलोमिटर ओ लालबोझीमे ३०० मिटर कैके जम्मा ५.८ किलोमिटर दूरीमे राजमार्ग निर्माण हुइना बाँकी रहल बा । धनगढीमे वैशाखभित्रे निर्माण कार्य पूरा हुइना हुइलेसे फेन बसन्ता ओ लालबोझीमे ढिलाई हुइना आयोजनाके इन्जिनीयर पदम मडै बटैलै ।
‘बसन्ता करिडोरके दुई किलोमिटरमे रुख कटानके लाग आदेश हुइलेसे फेन काम आभिन आघे बह्रल नैहो,’ उहाँ कहलै, ‘लालबोझीमे ३०० मिटर दूरीमे लडियासे सडक कटान करटी आइल आरसे तत्काल वहाँ फेन काम आघे नैबह्री ।’
कैलालीमे इहीसे आघे नै हुलाकी राजमार्ग निर्माणके कार्य पूरा होसेकल खण्डमे सडक स्तरोन्नतिके कार्य सुरु होसेकल बा । इहीसे आघे, निर्माण हुइल मार्गहे शहरी क्षेत्रमे चार लेन ओ अन्य क्षेत्रमे दुई लेनके बनैना कार्य हुइटी रहल बा ।
बसन्ता करिडोरके १४ किलोमिटरमे दुई लेनके सडक बनसेकल ओ अन्य खण्डमे स्तरोन्नतिके काम हुइटी रहल इन्जिनीयर मडै बटैलै । ओस्टके, ६२ किलोमिटर नै लम्बाइ रहल कञ्चनपुरमे हालसम १७ किलोमिटरमे कालोपत्रे कैना कार्य पूरा हुइल बा । उ जिल्लामे आभिन ४५ किलोमिटरमे कालोपत्रे कैना बाँकी रहल बा ।
२०७३ से कञ्चनपुरमे हुलाकी राजमार्ग निर्माणके कार्य सुरु करल रहे । धनगढीसे बुटाबारीसम २० किलोमिटर, बुटाबारीसे बेल्डाँडीसम २० किलोमिटर ओ बेल्डाँडीसे दैजीसम २२ किलोमिटर कैके तीन प्याकेजमे निर्माणके कार्य हुइटी रहल बा ।
तीन प्याकेजके म्याद ओराइल बा । छ महिना म्याद थपके लाग प्रक्रिया आघे बह्राइल इन्जिनीयर मडै बटैलै । कञ्चनपुरमे हुलाकी राजमार्ग निर्माणमे हालसम एक अर्ब ओ कैलालीमे नयाँ पुरान कैके तीन अर्ब रुपैयाँ लगानी हुइल जनाइल बा ।
बसन्तामे हुलाकी सडक निर्माणमे ढिलाइ
बसन्ता वन क्षेत्रमे दुई किलोमिटरमे रुकल हुलाकी राजमार्ग विस्तारके लाग कानूनी डगरा खुल्लेसे फेन काम भर आभिन आघे बह्रे सेकल नैहो ।
नेपाल सरकारके मन्त्रिपरिषद्से गैल फागुनमे रुख्वा कटानके आदेश डेना निर्णय करल रहे । निर्णय हुइल एक महिनासे ढिउर हुइलेसे फेन काम आभिन आघे बह्राइल नैहो । कैलारी गाउँपालिका–५ के कटैनी लडियासे छटकपुर बसन्तासम पर्ना दुई किलोमिटर खण्डमे रुख्वा कटानके आदेश नैहोके चार बरससे काम रुकल रहे ।
कैलारीके कटैनी लडियासे भजनी नगरपालिकाके लालबोझीसम बसन्ता वन क्षेत्रमे जम्मा १८ मध्ये १६ किलोमिटरमे राजमार्ग निर्माणके कार्य होसेकल बा । मने, कानूनी अडचनके कारण दुई किलोमिटर खण्डमे भर काम रुकल रहे ।
उ खण्डमे राजमार्ग निर्माणके लाग २०७३ सालमे ठेक्का हुइलेसे फेन काम आघे बह्रे सेकल नैरहे । जिल्लाके आउर सक्कु ओर हुलाकी राजमार्ग बनसेक्लेसे फेन उ खण्डमे ट्रयाकसमेत खोले सेकल नैहो । उक्त खण्डमे तुण्डी, प्रेरा, चन्द्रा एण्ड बसन्ता जेभीसे राजमार्ग निर्माणके ठेक्का पैले बाटै । अइना जेठ मसान्तमे ठेक्का अवधि ओराजैना जनाइल बा । मने, रुख्वा कटान आदेशमे हुइल ढिलाइके कारण ठेक्काके म्याद थप हुइना मडै बटैलै ।
