जिल्ला लिग फुटबल प्रतियोगिता सुरु
पहुरा समाचारदाता
धनगढी, ४ वैशाख । धनगढीमे जिल्ला लिग फुटबल प्रतियोगिता सुरु हुइल बा ।
‘स्वास्थ्यके लाग खेलकुल, राष्ट्रके लाग खेलकुद’ कना नारा सहित धनगढीमे उ प्रतियोगिता शनिच्चरसे सुरु हुइल हो । धनगढी रंगशालामे सुरु हुइल प्रतियोगिता जेठ १ गतेसम सञ्चालन हुइना आयोजक कैलाली जिल्ला फुटबल संघ जनैले बा । फुटबल प्रतियोगितामे कैलाली जिल्लाके १७ ठो फुटबल टिमके सहभागिता रहल बा ।
जिल्ला लिग फुटबल प्रतियोगिताके सुदुरपश्चिम प्रदेश खेलकुद परिषदके सदस्य सचिब दीपकबहादुर सिँह उट्घाटन करल रहिट । उट्घाटन कार्यक्रममे उहाँ सुदूरपश्चिम प्रदेश फुटबल खेलके उर्वर क्षेत्र रहल ओरसे उ प्रतियोगितासे मजा खेलाडी उत्पादन हुइना बटैलै ।
फुटबल खेलप्रति युवाहुक्रनके आकर्षण बह्रना ओ सुदूरपश्चिमके पहिचान राख्न जिल्ला लिग फुटबल प्रतियोगितासे सहयोग पुग्ना विश्वास व्यक्त करलै । ओस्टके कैलाली जिल्ला फुटबल संघ कैलाली उपाध्यक्ष अनिल मल्ल नयाँ फुटबल खेलाडी उत्पादन कैना उद्देश्यसे जिल्ला लिग फुटबल प्रतियोगिता आयोजना करल जानकारी डेलै ।
जेम्ने कैलाली जिल्ला फुटबल संघमे आबद्ध रहल १७ ठो टिमके सहभागिता रहल जनाइल बा । केन्द्रीय अखिल नेपाल फुटबल संघके बार्षिक नीति तथा कार्यक्रम अनुसार आयोजना करल प्रतियोगिता आयोजना करल कैलाली जिल्ला फुटबल संघ कैलाली उपाध्यक्ष मल्ल बटैलै ।
जिल्ला लिग फुटबल प्रतियोगिता अन्तरर्गत पहिल उद्घाटन खेल स्टार सिटी युथ क्लब ओ धनगढी युवा क्लब बिच हुइलमे खेलमे स्टार सिटी १ गोलसे विजय हुइल बा । खेलमे धनगढी युवा क्लबके २ गोल ओ स्टार सिटीके ३ गोल हुइल रहे ।
