ओमआशा किशोरकिशोरीमैत्री स्वास्थ्य सेवाके लाग सूचीकृत
पहुरा समाचारदाता
धनगढी, ५ वैशाख । कैलालीके धनगढी उपमहानगरपालिका गुरहीचोकस्थित ओमआशा अस्पताल किशोर–किशोरीमैत्री स्वास्थ्य सेवा सञ्चालनके लाग सूचीकृत करल बा ।
संघीय स्वास्थ्य तथा जनसंख्या मन्त्रालय अन्तर्गतके परिवार कल्याण महाशाखा अस्पतालके अनुगमन करके सेवा सञ्चालनके लाग शुकके रोज उ अस्पतालहे किशोरकिशोरीमैत्री स्वास्थ्य सेवा सञ्चालनके लाग सूचीकृत करल घोषणा करल बा ।
कार्यक्रममे महाशाखाके निर्देशक तारानाथ पोखरेल ओमआशा अस्पतालके प्रमुख भूपेन्द्र चौधरीहे सूचीकृत प्रमाणपत्र हस्तान्तरण करलैं ।
किशोरकिशोरीमैत्री स्वास्थ्य सेवा सम्बन्धी प्रावधानहे निजी क्षेत्रसे परिवार योजना सम्बन्धी सुविधा प्रदान करैना उद्देश्यसे गेरुवा ग्रामीण जागरण संघ ओके स्वास्थ्य संस्थामार्फत ओम आशा अस्पतालमे एक वर्ष आघेसे सेवा शुभारम्भ करले रहे ।
अस्पतालहे सूचीकृत प्रमाणपत्र प्रदान करटी परिवार कल्याण महाशाखा निर्देशक पोखरेल ओमआशा अस्पताल किशोरकिशोरीमैत्री स्वास्थ्य सेवाहे निरन्तरता डेहेपरना सुझाव डेलैं । उहाँ कलैं, कुछ अस्पताल क्षणिकके लाग कार्यक्रम सुरु करना मने, दिगो हुइना मेरिक काम नैकरल पाइल बा । उहाँ अस्पतालसे किशोरकिशोरीमैत्री सम्बन्धी बनल मापदण्ड पालना करके सेवाहे प्रभावकारी रुपमे आघे बह्रैना फेन सुझाव डेलैं ।
महाशाखा प्रमुख पोखरेल हस्तान्तरण करल प्रमाणपत्रमे निर्देशिकासे तोकलबमोजिम ८० प्रतिशत मापदण्ड अस्पतालसे पालना करल उल्लेख बा । उहाँ कलैं, कुछ मापदण्ड पुगल नैहो । टबेमारे तीन हप्ताभित्रे उ मापदण्डके पालना करके आघे बह्रेपरी ।
परिवार नियोजन तथा प्रजनन् स्वास्थ्य शाखा प्रमुख कविता अर्याल निजी क्षेत्रसे फेन किशोरकिशोरीमैत्री स्वास्थ्य सेवा प्रदान करटी प्रभावकारी हुइना हुइल ओरसे महाशाखा सूचीकृत करल बटैली ।
उहाँ ओम आशा अस्पताल १५ से २४ वर्ष उमेर समूहके किल नैहुके अन्य उमेर समूहके युवाहुकनहे फेन समेटके कार्यक्रम आघे बह्रैना सुझाव डेली । उहाँ कली, किशोरकिशोरी विवाहित ओ अविवाहित दुनु बाटैं, टबेमारे जत्रासेकलेसे ढेरसे ेिरहे समेट्के सेवा प्रदान करनाओ अस्पताल ध्यान डेना जरुरी बा ।
उहाँ किशोरकिशोरीहुकनहे प्रजनन्बारे जानकारी नैहुके समस्या भोगल बटैली । उहाँ कली, गर्भनिरोधकके सेवाबारे किशोरकिशोरीहे खासे जानकारी नैरहठ । टबेमारे यकर जनचेतना फैलैना महाशाखा टमान कार्यक्रम करटी बा ।
स्वास्थ्य कार्यालय कैलालीके प्रमुख लालबहादुर धामी किशोरकिशोरीहुक्रे खुलके परिवार नियोजनाके साधन किने सेक्ना अवस्था नैरहल बटैलैं । उहाँ कलैं, लग्गेही अस्पताल वा स्वास्थ्य संस्था रहठ, मने बाहेर हल्ला फैलि कि कहिके उहाँहुक्रे उहाँसे परिवार नियोजनके साधन खरिद नैकरठैं । बटेमारे उहाँहुकनमे जोखिम बह्रल बा ।
उहाँ अस्पताल ओ स्वास्थ्य संस्था फेन किशोरकिशोरीमैत्री हुइना आवश्यक रहल सुझाव डेलैं ।
पिएसआइके प्रादेशिक म्यानेजर सन्तोष महतो संस्थासे परियोजना अन्तर्गत सुदूरपश्चिमके आठ ओ लुम्बिनीके आठ करके १६ ठो संस्थामार्फत किशोरकिशोरीमैत्री सेवा सञ्चालन हुइटीरहल बटैलैं । उहाँ परियोजनाअन्तर्गत स्वास्थ्य संस्थामे निःशूल्क परिवार नियोजनके साधन वितरणसंगे दक्ष स्वास्थ्यकर्मीहुकनसे प्रजनन स्वास्थ्यके सुविधा फेन प्रदान करल बटैलैं ।
उहाँ परियोजनाअन्र्तगत दौतरी मिटिङ, विद्यालयमे स्वास्थ्य कार्यक्रम लगायतके गतिविधि फेन करटीरहल बटैलैं ।
गैरुवा संस्थाके कार्यक्रम व्यवस्थापक यफु केसी परियोजना अन्तर्गत परिवार योजनाके परामर्श सेवा, आईयूसिडी, इम्प्लान्ट, डिपो ओ पिल्स निःशूल्क उपलब्ध करैटीरहल बटैलैं । उहाँ परियोजना शुरु हुइलपाछे सुदूरपश्चिम प्रदेशमे दुई हजार पाँच सय ढेर सेवा लेहल बटैलैं ।
