दुई थान भरुवा बन्दुक सहित एक पक्राउ
पहुरा समाचारदाता
धनगढी, १० बैशाख । कैलालीके गौरीगंगा नगरपालिका वडा नं ७ बैठना विर बहादुर थापामगर दुई थान भरुवा बन्दुक सहित पक्राउ परल बटै ।
गोली लागल मनैया उपचार कराई आइल बा कना सुचनाके आधारमे घटनाबारे सोधखोज करेबेर विर बहादुरहे भरुवा बन्दुक थान–२ केप, गोलीसहित पक्राउ करल जिल्ला प्रहरी कार्यालय कैलालीके प्रवक्ता प्रहरी नायव उपरिक्षक भरत चौधरी जनैलै । गौरीगंगा नगरपालिका वडा नं ७ बैठना विर बहादुर थापामगर उहे बैठना ईन्द्र बहादुर वि.क.हे घाहिल अवस्थामे जिल्ला कैलाली गौरीगंगा नगरपालिका वडा नं ८ स्थित सौगात क्लिनिकमे उपचार करे नानल रहिट ।
सूचना पैटीकी बैशाख ८ गते सकारे साढे ९ बजेक समयमे प्रहरी कार्यालयसे खटल प्रहरी टोली घटनाबारे सोधपुछ करेबेर विरबहादुर थापामगर ओ ईन्द्र बहादुर वि.क. बैशाख ७ गते रातके वन्य जन्तु चोरी शिकारी करे गैल रहिट । आ–अपन भरुवा बन्दुक ओ आवश्यक पर्ना चिजवस्तु साथमे बोकके कैलाली गौरीगंगा नगरपालिका वडा नं ९ शिवशंकर सामुदायिक वनभिटर जाके शिकार खोजी करटी रहल अवस्थामे विर बहादुरसे बोकल भरुवा बन्दुक पड्कके संगे रहल ईन्द्र बहादुरके बाँया ठेहुनिक टरे भागमे लागके घाहिल हुइल प्रहरी नायव उपरिक्षक बटैलै ।
घाहिल ईन्द्रबहादुरके उपचार हुइटी रहल बा । विरबहादुरहे हात हतियार खर खजाना तथा बिस्फोटक पदार्थ शीर्षकमे मुद्दा दर्ता करके ठप अनुसन्धान हुइटी रहल जिल्ला प्रहरी कार्यालय कैलाली जनैले बा ।
ओस्टेक मोरङमे शिकार खेले गैल एक पुरुषके भरुवा बन्दूक पड्कके मृत्यु हुइल बा । केराबारी गाउँपालिका–३ के ३२ वर्षीय हस्त राईके भरुवा बन्दुक पड्कके मृत्यु हुइल हो ।
शिकार खेले संघरीयासंग बनुवा गैल राईके अपनही बोकल भरुवा बन्दूक पड्कके छर्रा लागके मृत्यु हुइल प्रहरी जनैले बा । मोरङ प्रहरीके प्रवक्ता डीएसपी मानबहादुर राईके अनुसार गजेन्द्र राई ओ रुविन लिम्बूसंग उहाँ बुधके रात शिकार खेले केराबारी–३ के बाघदले जंगलमे पुगल रहिट ।
गजेन्द्र ओ रुविन अपनही इलाका प्रहरी कार्यालय केराबारीमे आके घटनाके बारेमे प्रहरीहे जानकारी कराइल रहिट । दुनु जनहनहे नियन्त्रणमे लेके घटनाके विषयमे अनुसन्धान सुरु करल प्रहरी जनैले बा ।
