थप ८ हजार २ सय ८७ कोरोना संक्रमित, ५३ के मृत्यु
काठमाडौं, २५ वैशाख । बितल २४ घण्टामे कोरोना भाइरस संक्रमणसे ८ हजार २ सय ८७ जाने संक्रमित हुइल बाटैं । स्वास्थ्य तथा जनसंख्या मन्त्रालयसे आज (शनिच्चर) डेहल जानकारी अनुसार टमान जिल्लाके प्रयोगशालामे करल १७ हजार ३ सय १५ पीसीआर परीक्षणसे ८ हजरा २ सय ८७ जानेमे संक्रमण पुष्टि हुइल हो । यीसँगे नेपालमे संक्रमितके कूल संख्या ३ लाख ८५ हजार ८ सय ९० पुगल बा ।
अस्टेक ओहे अवधिमे ५३ जानेक मृत्यु हुइल मन्त्रालयके तथ्यांक बा । यी समेत करके मृतकके संख्या ३ हजार ६ सय ३२ पुगल बा ।
२४ घण्टामे एन्टिजेन विधिसे करल ९ सय ९८ परीक्षणमे १ सय ३१ जहनमे पोजिटिभ डेखाइल बा । पाछेक २४ घण्टामे ३ हजार ३ सय ७० जाने डिस्चार्ज हुइल बाटैं । हालसम डिस्चार्ज हुइनाके संख्या २ लाख ९८ हजार ७ सय ६५ पुगल बा ।
नेपालमे सक्रिय संक्रमितके संख्या भर ८३ हजार ४ सय ९८ पुगल बा । क्वारेन्टाइनमे रहल संख्या ३ सय ९८ रहल मन्त्रालय जनैले बा । हालसम पीसीआर परीक्षण २६ लाख १५ हजार ७ सय २० करल बा ।
