कोरोना संक्रमित सांसद फेन मत डेहे पैना
काठमाडौं, २६ वैशाख । प्रधानमन्त्री केपी शर्मा ओली विश्वासके मत लेना संसदमे आके कोरोना संक्रमित सांसदहुक्रे फेन मतदान करे पैना हुइल बाटैं ।
प्रधानमन्त्रीसे विश्वासके मत लेना प्रयोजनके लाग संसदके विशेष अधिवेशन काल्ह (सोम्मार) बलाइल बा । संसद अधिवेशनआघे करल परीक्षणमे २६ से ढेर सांसदहे कोरोना संक्रमण पुष्टि हुइल बा ।
आज बैठल प्रतिनिधिसभाके कार्यव्यवस्था परामर्श समितिके बैठकसे कोरोना संक्रमित सांसदहुकनहे फेन मतदानमे सहभागी हुइना व्यवस्था मिलैना निर्णय करले बा ।
‘संक्रमण हुइल माननीयहे बाहेर ढरना ओ मतदानके बेला भित्तर प्रवेश डेना ओ छुट्टे कोठामे मतदान करना व्यवस्था मिलैना निर्णय करले बा,’ संसद सचिवालयके प्रवक्ता रोजनाथ पाण्डे कलैं ।
प्रतिनिधिसभाके बैठकमे पीसीआर टेष्ट करके रिपोर्ट नेगेटिभ आइल सांसद किल प्रवेश पैही । हालसम ५० से ढेर सांसदके परीक्षण करना बाँकी बा । उहाँहुकनके आजु स्वाब संकलन करके काल्हसम रिपोर्ट अइना व्यवस्था मिलैना कार्यव्यवस्था परामर्श समिति निर्णय करले बा ।
