लोकसेवा आयोगके अध्यक्षमे पूर्वसचिव रेग्मी सिफारिस
काठमाडौं, २६ वैशाख । संवैधानिक परिषदसे लोकसेवा आयोगके अध्यक्षमे पूर्वसचिव माधव रेग्मीहे नियुक्त करना सिफारिस करले बा ।
आज बिहान प्रधानमन्त्री निवास बालुवाटारमे बैठल परिषद बैठकसे झापा गौरादह–३ के रेग्मीहे लोकसेवा आयोगके अध्यक्ष पदमे नियुक्तिके सिफारिस करल बटागिल बा ।
लोकसेवा आयोगके अध्यक्षमे सचिव शिशिरकुमार ढुंगाना ओ रेग्मीके नाम प्रस्तावित रहे । मने परिषद बैठकसे प्रधानमन्त्री केपी शर्मा ओलीके गृहनगरके रेग्मीहे नियुक्तिके सिफारिस करल हो ।
प्रस्तावित संवैधानिक आयोगके पदाधिकारीके नाम संसदीय सुनुवाइ समितिसे अनुमोदन करलपाछे राष्ट्रपतिसे नियुक्त हुइना व्यवस्था बा ।
के हुइट रेग्मी ?
काँग्रेस निकट मानजैना रेग्मी परिवार खोटाङसे बसाइँ सरके झापा आइल रहैं । हाल काठमाडौंके अनामनगरमे बसोबास करटी अइलेसे फेन उहाँक जन्म भर खोटाङके दुबेकोटमे हुइल रहे ।
रेग्मी लोकसेवा आयोगके पूर्वसचिव हुइट । रेग्मी शाखा अधिकृतके रुपमे फेन आयोगमे काम करले रहैं । लोकसेवा आयोगमे आठ वर्ष काम करल अनुभव संगालल कटी उहाँ ओहे आयोगके अध्यक्ष बन्न इच्छा डेखैटी लबिङ करले रहैं ।
रेग्मी सरकारी सेवामे प्रवेश करल भर २०३७ सालमे हो । २०३७ साल वैशाख ९ गते अस्थायी डिठ्ठा हुके सरकारी सेवा सुरु करल उहाँ ओहे वर्ष स्थायी खरदार बनल रहैं । सरकारी सेवाके सबजैसिन पदमे क्रमशः सेवा करल अनुभव संगालल उहाँ २०६८ साल साउन ११ गते सचिव बनल रहैं । सचिवके रुपमे पूरै पाँच वर्ष कार्यकाल पूरा करके उहाँ ५४ वर्षके उमेरमे लोकसेवा आयोगसे रिटायर्ड हुइल रहैं ।
रेग्मी नेकपाके एकता भंगके फैसला करना सर्वोच्च अदालतके न्यायाधीश कुमार रेग्मीके सहोदर दाजु हुइट ।
– एजेन्सी
