विश्वासके मतके प्रक्रिया सोम्मारे टुंगो लगैना
काठमाडौं, २६ वैशाख । प्रतिनिधिसभाके कार्यव्यवस्था परामर्श समिति विश्वासके मतके प्रक्रिया काल्ही (सोम्मार) टुंगो लगैना हुइल बा ।
कार्यव्यवस्था परामर्श समितिके आजके बैठकसे प्रधानमन्त्री केपी शर्मा ओलीसे विश्वासके मत मागेक लाग बोलाइल प्रतिनिधिसभाके अधिवेशन एक दिनमे सेक्ना निर्णय करल हो ।
’विश्वासके मतके प्रक्रिया काल्ही सेक्ना निर्णय हुइल बा,’ प्रतिनिधिसभाके सचिव गोपालनाथ योगी बटैलैं ।
अस्टेक, प्रतिनिधिसभाके बैठकमे कोरोना संक्रमित सांसदहुकनहे फेन मतदानमे सहभागी करैना व्यवस्था करना निर्णय फेन कार्यव्यवस्था करले बा । कोरोना संक्रमित हुइल सांसदहुकनहे मतदानमे सहभागी कराइक लाग विशेष व्यवस्था करना निर्णय हुइल हो ।
पीसीआर परीक्षण नैकराइल सांसदहुकनहे अनिवार्य रूपमे पीसीआर परीक्षण करैना कना फेन कार्यव्यवस्था निर्णय करले बा ।
काल्ह (सोम्मार) १ बजेक लाग प्रधानमन्त्री ओली विश्वासके मत लेना प्रयोजनके लाग प्रतिनिधिसभाके अधिवेशन आह्वान करल बा ।
