एसईई ओ कक्षा १२ के परीक्षा स्थगित
काठमाडौं, २७ वैशाख । राष्ट्रिय परीक्षा बोर्ड एसईई ओ कक्षा १२ के परीक्षा स्थगित करले बा । आज (सोम्मार) बिहान बैठल बोर्ड बैठकसे जेठ १३ गतेसे सञ्चालन हुइना एसईई ओ जेठ २६ गतेसे हुइना कक्षा १२ के परीक्षा स्थगित करना निर्णय करल हो ।
औरे सूचना नैहुइटसमके लाग दुनु परीक्षा स्थगित करल बोर्डके अध्यक्ष चन्द्रमणि पौडेल जानकारी डेलैं । ‘सरकार फेन परीक्षा नैचलैना कले बा, कोभिड फेन बह्रटी बा, नियन्त्रणमे नैहो, परीक्षा सञ्चालन करे सेक्ना अवस्था नैरहल, तत्कालके लाग स्थगित करगिल, परीक्षा हुइना समय पुनः औरे सूचना निकारब,’ उहाँ कलैं ।
जेठ १३ गतेसे सञ्चालन हुइना एसईईके लाग प्रश्नपत्र छपाइके काम ओराइल बा । ५ लाख १७ हजार विद्यार्थी एसईईके तयारी बाटैं । अवस्था नियन्त्रणबाहेर रहल ओरसे देशभरके २ हजार १९ परीक्षा केन्द्रमे परीक्षा सञ्चालन हुइ नैसेक्ना निष्कर्ष निकाकरल बोर्डके सदस्यहुक्रे बटैलैं । जेठ २६ से हुइना कक्षा १२ के परीक्षा फेन अन्यौलमे बा । परीक्षा हुइना महिना दिन बाँकी बा मने महामारीसे पठनपाठन बन्द बा कलेसे अधिकांश जिल्ला निषेधाज्ञामे बा । करिब ४ लाख परीक्षार्थी कक्षा १२ मे बाटैं ।
यीवर्ष कक्षा १२ के हकमे अनलाइनसे प्रश्नपत्र पठैना व्यवस्था करल बा । गैलवर्ष फेन कोरोना महामारीकेबीच अनलाइनसे प्रश्नपत्र पठाके घरपायक परीक्षा केन्द्रमे परीक्षा सञ्चालन करल रहे ।
यी वर्ष इन्टरनेट सुविधा पुगल निश्चित परीक्षा केन्द्रमे किल प्रश्नपत्र पठाके परीक्षा लेना तयारी बा । गैलवर्ष फेन कोरोना महामारीके कारण एसईईके परीक्षार्थीहे विद्यालयसे करल आन्तरिक मूल्यांकनके आधारमे बोर्ड नतिजा डेले रहे ।
अस्टेक बोर्ड बैठकसे एसईई ओ कक्षा १२ के परीक्षा कैसिक सञ्चालन करे सेकजाइ कना अध्ययन करना ५ सदस्यीय कार्यदलसमेत गठन करले बा । शिक्षा तथा मानव स्रोत विकास केन्द्रके महानिर्देशक बैकुण्ठ अर्यालके संयोजकत्वमे कार्यदल गठन करल हो ।
कोरोनाके संक्रमण कायमे रहिके भौतिक उपस्थितिमे परीक्षा सञ्चालन करना अवस्था नैरहलेसे कैसिक आघे बह्रना मोडालिटी तय करना कार्यदल बनैना बोर्ड जनैले बा ।
