कैलालीमे थप एक साता निषेधाज्ञा लम्ब्यइना सिफारिस
धनगढी, २८ वैशाख । कैलालीमे जारी निषेधाज्ञाहे थप एक साता लम्ब्यइना सिफारिस करल बा । सोम्मारके रोज बैठल जिल्ला कोभिड संकट व्यवस्थापन केन्द्रके बैठकसे दोसर लहरके कोरोना भाइरसके संक्रमण बह्रटीरहल बेला थप एक साता निषेधाज्ञा लम्ब्यइना निर्णय करटी प्रमुख जिल्ला अधिकारी समक्ष सिफारिस करल हो ।
जिल्ला प्रशासन कार्यालयके सूचना अधिकारी शिवराज जोशी हाल वैशाख ३० गतेसम लागु हुइना मेरिक प्रजिअसे जारी हुइल निषेधाज्ञाहे जेठ ६ गतेसम लम्ब्यइना सिफारिस करना निर्णय कोभिड संकट व्यवस्थापन केन्द्रके बैठकसे करल जानकारी डेलैं ।
बैठकसे बिफेसे लागु हुइना मेरिक यीआघे बिहान ६ से १० बजेसम सञ्चालन हुइटीरहल अत्यावश्यक बाहेक तरकारी, फलफूल तथा खाद्य वस्तुके पसल व्यवसाय मंगर, बिफे ओ शनिच्चर बिहान ९ बजेसम किल खोले पैना निर्णय समेत करले बा ।
वित्तिय संस्थाके सेवा फेन बन्द
कोभिड संकट व्यवस्थापन केन्द्रके बैठकसे यीआघे बिहान १० से दिनके १ बजेसम सञ्चालन हुइटीरहल बैँक तथा वित्तिय संघसंस्थाहे समेत बन्द करना निर्णय करले बा । मने राजश्व दाखिला ओ सरकारी कारोवारमे भर रोक नैलगाजाइ ।
बैँक तथा वित्तीय संस्थाहे अत्यावश्यक भुक्तानीके लाग एटीएम ओ विद्युतीय प्रणालीसे सेवा प्रवाहके समुचित व्यवस्था मिलैना समेत निर्देशन डेले बा ।
