पूर्व राजा ज्ञानेन्द्र कोरोना संक्रमणमुक्त, कोमलहे आईसीयूसे वार्डमे सारगिल

काठमाडौं, २८ वैशाख । पूर्व राजा ज्ञानेन्द्र शाह कोरोना संक्रमणमुक्त हुइल बाटैं । थापाथलीस्थित नर्भिक अस्पतालमे १८ दिनसे उपचारत शाहके स्वास्थ्य अवस्थामे सुधार हुइल अस्पताल प्रेस विज्ञप्तिमार्फत जानकारी डेले बा ।

अस्पताल भर्ना हुइल कुछ दिनपाछे उहाँहे प्लाज्मा थेरापी विधिसे उपचार सुरु करल रहे । स्वास्थ्य अवस्थामे सुधार हुइलपाछे कुछ दिनआघेसे आईसीयूसे वार्डमे सारल अस्पताल जनैले बा । लगातार अक्सिजनके सपोर्टमे उपचार करैटीरहल शाहके स्वाब रिपोर्ट नेगेटिभ आइलपाछे अक्सिजन डेना छोरल बा ।

अस्टेक, पूर्व रानी कोमल शाहहे आईसीयूसे वार्डमे सारल बा । स्वास्थ्य अवस्थामे उहाँके लगातार सुधार हुइटीरहल अस्पताल जनैले बा । पूर्व अधिराजकुमारी प्रेरणा शाहके कोरोना रिपोर्ट यीआघे नेगेटिभ आसेकल बा ।