नयाँ सरकार गठनबारे आन्तरिक छलफलमे जसपा
काठमाडौं, २९ वैशाख । नयाँ सरकार गठन ओ पार्टीके भूमिकाबारे जनता समाजवादी पार्टी (जसपा)आन्तरिक छलफलमे जुटल बा । सरकार गठनके लाग एक दिन समय बाँकी रहल अवस्थामे प्रतिनिधिसभाके चौठा भारी ओ निर्णायक दल जसपाके शीर्ष नेताहुक्रे आपसी विवादके बीच आन्तरिक छलफलमे जुटल बाटैं ।
जसपाके शीर्ष नेताहुक्रे आज दिनके छलफलके लाग पार्टी कार्यालय बालकुमारीमे जम्मा हुइल बाटैं । अध्यक्ष महन्थ ठाकुरनिकट स्रोतके अनुसार जसपाके अध्यक्ष महन्थ ठाकुर ओ वरिष्ठ नेता राजेन्द्र महतो प्रधानमन्त्री केपी ओलीहे भेटके बालकुमारी पुगल हुइट । प्रधानमन्त्रीसँग लम्मा छलफलपाछे उहाँहुक्रे बालुकमारी पुगके अध्यक्ष उपेन्द्र यादव, संघीय परिषद् अध्यक्ष डा. बाबुराम भट्टराई लगायत शीर्ष नेता छलफलमे जुटल हुइट ।
‘सरकार गठनबारे जसपामे थप कुछ निर्णय हुसेकल नैहो । अब्बे भेटघाट हुइटा,’ अध्यक्ष उपेन्द्र यादव कलैं ।
सरकार गठनके लाग काँग्रेस सभापति शेरबहादुर देउवा छलफलमे रहल बाटैं । उहाँ माओवादी केन्द्र, एमालेके झलनाथ खनाल–माधवकुमार नेपाल ओ जसपाके उपेन्द्र यादव–बाबुराम भट्टराई पक्षसँग निरन्तर छलफल करटैं । जसपाके ठाकुर पक्ष भर ओलीके विकल्प खोजे नैसेक्ना कहिके देउवासँग छलफलमे चास देखैले नैहो ।
