हावाहुरीके कारण कैलालीमे १ के मृत्यु

धनगढी, ३० वैशाख । कैलालीमे बुधके साँझ आइल हावाहुरी ओ वर्षाके कारण १ जहनके मृत्यु हुइल बा । हावाहुरीसे टीकापुर–१, एकतानगरमे घरेम रुखवा ढल्के ४० वर्षिय देउकला कामीके मृत्यु हुइल जिल्ला प्रहरी कार्यालय कैलाली जनैले बा ।

बुध रात कच्ची घरमे ढलल रुखवासे डबके कामीके मृत्यु हुइल जिल्ला प्रहरी कार्यालय कैलालीके प्रहरी नायव उपनिरीक्षक भरत चौधरी जानकारी डेलैं ।

अस्टेक कैलालीके घोडाघोडी नगरपालीके साडेपानीमे कलकबहादुर रोकायाके घरमे बाज मरले बा । बाजके कारण घरमे क्षति पुगल बा । घरमा विद्युतीय मिटर बक्स, बाइरिङ्ग सहितके सामान बिग्रल ओ नष्ट हुइल बा ।

अस्टेक कैलारी गाउँपालिका ५ मे अंकित बोहराके टिनके छाना उरैले बा । घरके छाना उराके मानवीय क्षति नैहुइलेसे फेन घरेम रहल अन्नपात टिना लगायतमे क्षति पुगल प्रहरी जनैले बा ।

हावाहुरीसे जिल्लाके टमान स्थानके घर, गोठ तथा विद्युतके पोलमे क्षति करल हो । धनगढीमे फेन हावाहुरी ओ वर्षाके कारण टमान ठाउँमे विद्युत सेवा अवरुद्ध हुइल बा । कैलारी गाउँपालिका वडा नम्बर ७ भुँइयाफाँटा गाउँमे किल दर्जनौ घरमे हुरी क्षति करले बा ।