इजरायल–प्यालेस्टाइन द्वन्द्वः १०० से ढेर प्यालेस्टिनी ओ ७ इजरायली नागरिकके मृत्यु
काठमाडौं, ३१ । प्यालेस्टाइनसँगके टकराव बह्रटी गिल बेला इजरायसे गाजास्थित सीमा क्षेत्रमे भारी संख्यामे सैन्य बल तैनाथ करले बा । सोम्मासे जारी संघर्षमे दुनु पक्षसे हवाई आक्रमण हुइटीरहल बेला सीमामे इजरायलसे सेना तैनाथ करल हो ।
इजरायल आब जमिनसे फेन प्यालेस्टिनी विद्रोही संगठन हमासउप्पर कारबाही करना योजना बनाइल अन्तर्राष्ट्रिय सञ्चारमाध्यम जनैले बा । सीमामे इजरायली सेनासे बख्तरबन्ध गाडी ओ भारी मात्रामे हतियार नन्ले बा । सेना कम्तीमे फेन ७ हजार रिजर्भ सैनिकहे सीमामे बोलाइल बटागिल बा ।
बीबीसीके अनुसार सोम्मार रातसे सुरु हुइल दोहोरो आक्रमणमे परके १ सयसे ढेरके मृत्यु हुइल बा । प्यालेस्टाइनओर २७ जाने बालबालिकासहित १ सयसे ढेर ओ ७ जाने इजरायली आक्रमणमे मरल बाटैं ।
यीबीच इजरायलके टमान ठाउँमे यहुदी ओ अरब समुदायबीच झडप हुइटा । इजरायलके रक्षामन्त्री बेनी ग्यान्ट्ज शान्ति स्थापनाके लाग सुरक्षा व्यवस्था चुस्त ओ कडा पर्ना निर्देशन डेले बाटैं । अभिनसम हिंसामे संलग्न ४ सयसे ढेरहे पक्राउ करल फेन बटागिल बा ।
गाजा ओ इजरायलमे सोम्मारसे भड्कल हिंसा सन् २०१४ यहोरके गम्भीर हो । यकर सुरुवाती पूर्वी जेरुसेलममे गैल शुकके अल मक्सा मस्जिदनजिक हुइल झडपसे सुरु हुइल हो । ओकर तीन दिनपाछे सोम्मारसे भर दुनु पक्षसे रकेट ओ मिसाइल हमला हुइटा ।
पाछेक कुछ दिनसे जेरुसेलममे हिंसा भड्कटी रहे । जेरुसेलमस्थित अल अक्सा मस्जिदमे जैना प्रतिबन्ध लगाइलपाछे प्यालेस्टाइनके नागरिक क्रुद्ध हुइल रहैं । यी मस्जिदहे इस्लाममे तेसर पवित्र स्थान मानजाइठ । यी यहुदीहुकनके फेन पवित्र धार्मिक स्थलके रुपमे रहल बा ।
प्यालेस्टाइन रेड क्रेसेन्ट सोसाइटीके अनुसार इजरायली प्रहरीसँगके झडपमे ३ सयसे ढेर घाहिल हुइल बाटैं । सोम्मार ‘जेरुसेलम दिवस’ मनाइबेर हिंसा भड्कल हो । सन् १९६७ के अरब–इजरायल युद्धपाछे पूर्वी जेरुसेलमउप्पर कब्जा करल सम्झनामे सोम्मार जेरुसेलम दिवस मनाइल रहे ।
हमाससे अल अक्सा ओ शेख जराह मस्जिदसे प्रहरी हटैना पहिलेसे इजरायलसँग आग्रह करटी आइल रहे । उहिनसे डेहल समयसीमा ओराइलपाछे रकेट प्रहार करल बटाइल बा ।
सन् १९६७ के मध्यपूर्वके युद्धपाछे इजरायलसे पूर्वी जेरुसेलमउप्पर कब्जा करले रहे । उपाछे उ पूरा जेरुसेलमहे अपन राजधानी दाबी करटी आइल बा । मने अन्तर्राष्ट्रिय समुदाय यी नैमानठ । प्यालेस्टाइन भर पूर्वी जेरुसेलमहे भविष्यके एक सार्वभौम ओ स्वतन्त्र मुलुकके राजधानीके रुपमे लेटी आइल बा ।
यिहे विषयमे प्यालेस्टाइन ओ इजरायलबीच विवाद रहटी आइल बा कलेसे कैचो यी युद्धके रुप लेले बा । सन् २०१४ के जुलाईसे अगस्टके बीचमे हुइल द्वन्द्वमे २ हजार २ सय ५१ प्यालेस्टाइनी मरल रहैं । उमध्ये १ हजार ४ सय ६२ टे सर्वसाधारण रहैं । अस्टेक इजरायलके ६ सर्वसाधारणसहित ६७ जाने सैनिक मरल रहैं ।
