बैंकसे अत्यावश्यक सेवा किल डेना

काठमाडौं, ३१ वैशाख । बैंकसे अत्यावश्यकबाहेकके सेवा नैडेना हुइल बाटैं । पाछेक दिनमे कर्मचारीमे कोभिडके संक्रमण बह्रलसँगे बैंकसे प्रदान करना सेवा घटाइल हुइट ।

बैंकमे सेवाग्राहीके भीड कैसिक कम करे सेकजाइ कना सम्बन्धमे बिफेक रोज राष्ट्र बैंक ओ बैंकबीच छलफल हुइल रहे । ओहे छलफलके आधारमे संक्रमणके अवधिमे बैंकसे प्रदान करना सेवाबारे बैंकर्स संघसे विज्ञप्तिमार्फत सर्वसाधारणहे जानकारी कराइल हो ।

संक्रमणके अवधिमे फेन बैंकके सब एटीएम भर खुला रही कलेसे कार्यालय समयभर कल सेन्टर फेन सञ्चालन हुइ । अस्टे सेवाग्राही बैंकसे नगद निकारे पैही कलेसे ५० हजारसे कम रकम बैंकमे नगदमे जम्मा करे नैपैही । ५० हजारसे ढेर रकम किल नगदमे बैंकमे ढरे पैही । अस्टेक ग्राहक एक बैंकसे औरे बैंक वा खातामे रकम स्थानान्तरण करना, रेमिट्यान्स लेना÷पठैना ओ अन्तर्राष्ट्रिय व्यापारके लाग आवश्यक सेवा भर पैही ।