प्रधानमन्त्री ओली लेलै पद तथा गोपनीयताके शपथ
काठमाडौं, ३१ वैशाख । नवनियुक्त प्रधानमन्त्री केपी शर्मा ओली पद तथा गोपनीयताके शपथ ग्रहण करले बाटैं । आज शीतल निवासमे आयोजित समारोहमे राष्ट्रपति विद्यादेवी भण्डारी उहाँहे पद तथा गोपनीयताके शपथ करैली ।
बिफेक रोज राष्ट्रपति भण्डारी संविधानके धारा ७६ के उपधारा ३ अनुसार प्रतिनिधिसभाके सबसे भारी दलके संसदीय दलके नेताके हैसियतमे ओलीहे प्रधानमन्त्रीमे नियुक्त करले रहि ।
प्रधानमन्त्री ओली बैशाख २७ गते प्रतिनिधिसभामे विश्वासके मत प्राप्त करे सेकल नैरहैं । उपाछे स्वतः पदमुक्त हुइल ओली दलहे बहुमतके सरकार बनैना राष्ट्रपतिसे डेहल तीन दिनके समयमे केक्रो दाबी नैपरलपाछे पुनः प्रधानमन्त्री नियुक्त हुइल हुइट ।
यकर साथे पुराने मन्त्रीहे निरन्तरता डेके नयाँ मन्त्रिपरिषद् गठन करल बा । नयाँ मन्त्रीहुक्रे फेन पद तथा गोपनीयताके शपथ लेले बाटैं ।
शपथ ग्रहण समारोहमे उपराष्ट्रपति नन्दबहादुर पुन, सभामुख अग्नि सापकोटा, प्रधानन्यायाधीश चोलेन्द्र शम्शेर जबरा, राष्ट्रिय सभाके अध्यक्ष गणेशप्रसाद तिमल्सिनालगायतके विशिष्ट अधिकारीहुकनके उपस्थिति रहे ।
प्रधानमन्त्री ओली पुराने मन्त्रीहुकनहे दोहोर्यइले बाटैं । राष्ट्रपति शितल निवासमे पुराने मन्त्रीहुकनहे पुनः जिम्मेवारी डेहल हुइट ।
उपपप्रधानमन्त्रीमे ईश्वर पोखरेल, गृहमन्त्री रामबहादुर थापा, परराष्ट्रमन्त्री प्रदीपकुमार ज्ञवाली, उद्योग, वाणिज्य तथा आपूर्तिमन्त्री लेखराज भट्ट, ऊर्जा, जलस्रोत तथा सिँचाइमन्त्री टोपबहादुर रायमाझी, स्वास्थ्य तथा जनसंख्यामन्त्री हृदयेश त्रिपाठी, सहरी विकासमन्त्री प्रभु शाह, संघीय मामिला तथा सामान्य प्रशासनमन्त्री गणेशसिंह ठगुन्ना, कृषि तथा पशुपंक्षी विकासमन्त्री पद्मा अर्याल, खानेपानीमन्त्री मणि थापा, भौतिक योजना तथा पूर्वाधारमन्त्री वसन्त नेम्वाङ, शिक्षा, विज्ञान तथा प्रविधिमन्त्री कृष्णगोपाल श्रेष्ठ, सञ्चार तथा सूचना प्रविधिमन्त्री पार्वत गुरुङ, युवा तथा खेलकुदमन्त्री दावा तामाङ, कानुन, न्याय तथा संसदीय मामिलामन्त्री लीलानाथ श्रेष्ठ, भूमि व्यवस्था, सहकारी तथा गरिबी निवारणमन्त्री शिवमाया तुम्बाहाङ्फे, वन तथा वातावरणमन्त्री प्रेम आले, महिला, बालबालिका तथा ज्येष्ठानागरिकमन्त्री जुलिकुमारी महतोले पुनः शपथ लेहल हुइट ।
सम्बन्धित समाचार
